miscontrol

اعتقد الواحد مع مرور الوقت بيبدأ يفهم نفسه وانفعلاته اكتر

حاسه انى الفترة دى بقيت منظمه زياده عن اللزوم

انا الحمد لله بحب كل حاجة تبقى مترتبه ...بس مش للدرجة دى

عارفيين مسلسل مونك؟؟......انا حاسه انى بقيت زيه

اعتقد ان ده نوع من رد الفعل ...احساسى انى مش قادرة اسيطر على الحاجات اللى بتحصل فى حياتى ....مخلينى عايزه اسيطر اوى على الحاجات اللى فى ايدى......اللى اقدر عليها ...وتقريبا تقريبا ...مش لاقيه حاجة اطلع فيها غير الموضوع ده

ممكن يكون تحليل صح؟؟

عامة هى مش عادة وحشة اوى ...بس اعتقد لما الموضوع بيزيد عن حده بيتعب

محدش عارف اى حاجة نهايتها ايه

سبحان الله محدش عارف اى حاجة نهايتها ايه
كان فى واحدى صاحبت اسمها رباب
بس هى طب الزقازيق
فهم عندهم نظام امتحان الباطنة التحريرى عبارة عن 3 ورقات...متقسم عليهم اقسام المنهج
بيمتحنوهم على 3 ايام
والورقة فى الغالب بتبقى 10 حالات
فهى يوم امتحان الورقة التانية ...اتصلت اطمن عليها بعد الامتحان ...كانت منهاره على الاخر
اصلا رباب من الناس الأقويا جدا ماشاء الله ودايما متفائلين اللهم بارك
بس كانت ضايعة على الاخر
الوقت كان ضيق اوى فسابت 3 حالات ...وحتى اللى حليتهم طلع منهم 2 التشخيص بتاعهم غلط
فكانت حاسة ان خلاص الدنيا انتهت
بجد يومها قالتى كلام صعب اوى ...الدنيا كانت سودا فى عنيها اوى .....طبعا طول المكالمة بتعيط
ومكنتش عايزة تدخل باقى الامتحانات ..
امتحان الباطنة ده لمن لا يعرف هو بعبع الطب كله فعلا
فاللى بيقع فيه بيقع بجد !!
عشان اهلها فى البيت هيعملولها مشاكل جامدة على النتيجة
امبارح بكلمها اطمن عليها على النتيجة ...فلقيتها الحمد لله جابت جج
وده ماشاء الله كويس اوى بالنسبة ل 5
فسبحان الله انا لما قالتلى قعدت افتكر كلامها ويأسها يوم الامتحان واقارن بين نبره صوتها دلوقتى
حسيت سبحان الله الانسان بيتقلب بسرعة اوى
فكرت فى نفسى ساعتها ...فكرت فى اكتر حاجة انا نفسى فيها....
قياسا على الموقف بتاع رباب
احساسى ده اكيد هيتغير بعد كده....سواء الحاجة دى جاتلى اوى لا
فالواحد ياخد الموضوع من قصيره ومش يحزن على حاجة راحت ...او يفرح بحاجة جت ...لأن كل ده هيتغير
عاجلا ام اجلا هيتغير
حاسة انى هرد على نفسى واقول ...ان الواحد لما بيبقى فى الموقف مش بيعرف يفكر كده
صح فعلا!!
بس مع تكرار التفكير فى الموضوع ...هو ده معنى ثبوت العقيدة

لماذا نحتاج ان نفقد الشئ لكل نحس بوجوده؟؟



بمعنى ان الحاجة اللى عندى مش بحس بقيمتها



طيب احاول اشوف الموضوع من الناحية التانية



يعنى الحل انى لو عايزة حاجة



اتخطى حدود الزمن واعرف انها هزهد فيها بعد كده



وهاخدها من قصيرة:)

نحاول نصقل شخصيتنا ونقويها بالثقه بالنفس عشان نقدر نحدد وجهتنا بكل ثقه وبدون ما كلمه تأثر وتهزنا

waiting

The terminal

انا مش بحب الافلام اوى

بس ده فعلا من الافلام اللى أثرت فيا

انا مش بعرف احكى ...بس اكتر معنى طلعت بيه هو

Sense of waiting

الاحساس بالانتظار

فى الغالب بيبقى فى مراحل انتقاليه فى حياتنا

حيث تتصادم الامال مع الواقع ...حاجات نفسنا تتحقق مع صعوبات وواقع م قادرين نغيره

ممكن نقول شويه توهان ولخبطة ...الملح والفلفل بتوع الطبخة

ممكن كمان شوية ايمان بالمعجزات ...او بمعنى تانى ...توقعات غير مرئيه
بس ده كل مطلوب

مع انه فترة مش لذيذة

كأنك بتحضر نفسك للفترة اللى بعدها

وقت بتفلتر فيه اللى اتعلمته واللى غلطت فيه ..مع اعادة جدولة الاهداف والرؤيات

اعتقد انه من اكتر الاوقات المناسبة لاكتساب خبرات جديدة

الواحد بيبقى عنده المقدرة على الاستقبال

وبس ...ويبقى الانتظار!!
مش عارفة انا قدرت اوصل اللى انا عايزاه ولا لأ

فلسفة

اوقات بحس ان كل حاجة الواحد بيعملها فى حياته
بتبقى فعل ومتظر عليه رد فعل
ده مشكلتى
ليه لازم استنى رد فعل عشان احس بالحياة

انا هبطل فلسفة

1432

اللى يدخل اوضتى ...هيلاقيها ملايااااااانه لوحات

بحب اوى اكتب كتييير وافضل حاطه افكارى قدامى

تحس انك داخل فصل فى مدرسة

المهم

السنة اللى فاتت زى دلوقتى

عملت لوحه بحبها اوى

كانت اكنها بذرة

وطالع منها فرع صغير وورق كتير

البذرة سنة الف ربعمائة وواحد وثلاثون

وكل ورقة كان مكتوب فيها حاجة نفسى التزم بيها السنة دى

عدت السنة سبحان الله

ولقيت نفسى بفكر فى السنة الجديدة ولقيت اهدافى اتغيرت فيها

لقيت اللى بفكر فيه اختلف

سبحان الله الوقت بيعمل حاجات كتير

ummmm

الصورة دى شفتها فى الكلية كانوا بيشرحوا عليها يعنى ايه اكتئاب

بمعنى ان الشخص العادى هيفهمها ان فى نور فى اخر النفق

لكن المكتئب هيشوفها ان فى قطر جاى عليه

فانا عايزة اقول ان اى حاجة فى حياتنا ممكن نشوفها بصورة مضيئة او العكس

اقصد مش المواقف فى حياتنا هى اللى بتبقى صعبة او سهلة....لكن النقطة احنا شايفينها ازاى وعلى الاساس ده بنتعامل معاها:)

there is nothing u can do but hope in ALLAH

confused

HOPE

فى كل توب ابيض نقط سودا

كان معايا امبارح وردة حمرا جميلة اوووى ....فعلا تبارك الله فيما خلق....شكل الورق بتاعها جميل اوى

قعدت اتأمل فيها كتير

بعد شوية لما ركزت لقيت فيها كمية حشرات ...كتير اوى

صغيرة جداااااا....وانواع مختلفة

جالى وقتها خاطر ان مهما كانت الحاجة جميلة ...برضو هنلاقى فيها عيوب

اللى اقصده ان اوقات فى حياتنا ...بننبهر بحاجات كتير او اشخاص

مقصدش انها حاجات مش تستاهل

بس التفاعل بشكل مبالغ فيه ....

overexpectation

مش عارفة انا ليه محبطة كده:(

آلام الانسان

فى يوم نزلت الاستقبال عندنا فى المستشفى

وكان فى عيان جاى بتوقف قلبى....مش عارفة بالعربى كده صح ولا ايه

Ht arrest

كان حوالى 35 ستة ...يعنى يعتبر شاب...والدته واخته جايبينه

كان عنده مشاكل فى القلب من زمان وعمل كى وموال كده

عملنا له و ECG

وبعدين الدكاتره قرروا ان مفيش حل غير الصاعقة الكهربية ...عشان يرجعوا القلب للنورمال ريزم

كان اول مرة فى حياتى اشوفها بجد

الدكاتره الكبار قعدوا يقولولنا طلعوا اهل العيان بره ....كله يبعد عن السرير ...وحطينا عليه جل ازرق كده

كان احساس غريب عليا انى اشوف حد بيتنفض النفضه دى قدامى....يااااه

ربنا يشفي الجميع

انا كل اللى كنت بفكر فيه امه اللى بره دى وشايفه كل حاجة ...اى نعم احنا طلعناهم بس انتو عارفين الشعب المصرى ....شايفين كل حاجة من بره

دموعها كانت ماليه عنيها ....كان هاين عليا اروح احضنها بس قلت مش اخضها

فعلا كان موقف صعب

انا حاسة باحباط ...انى ممكن اوصل لمرحلة انى اتعامل مع الام الانسان بصورة من البرود او ...التعود ...مش عارفة

اللهم انك اعز واعظم واكبر مما اخاف واحذر

أجمل ما فى الزواج ...الاستعداد له

أجمل ما فى الزواج ...الاستعداد له

كلمة كده مش عارفة مين قالها

بس فاكره انى قريتها مرة ولفتت انتبهاهى

مكنتش فاهمة معناها

وبعدين لما قعدت وفكرت فيها شوية لقيتها انها صح جدا

بس فى نقطة ...ان معظم الناس فاهماها بمنطق ...وانا ليا رأى مختلف شوية

خلينا نبدأ من الاول شوية

فى أية جميلة اووى بتقول ...كُلِّ امْرِئٍ مِنْهُمْ يَوْمَئِذٍ شَأْنٌيُغْنِيهِ)[عبس:37]

يمكن انا جاية من بعيد شوية بس هفهمكم قصدى

الاية هنا طبعا بتتكلم عن يوم القيامة وان كل انسان هيبقى ملهى فى حاله حتى عن اقرب الاقربين ليه يوم يفر المرء من أخيه وأمه وأبيه وصاحبته وبنيه

طيب هنلاقى ان ده موجود فى الدنيا بس بشكل مغاير تماما

بمعنى ان النفس البشرية دايما بتدور على حاجة تشغلها...

تشغلها عن حاجات خايفة منها ....حاجات مش فاهماها ....حاجات مش قادرة تنساها ....حاجات مؤلمة ....وهلم جرا

والمثال على كده ان بعض الناس لما تعيش مواقف الم فى حياتها ...بتكون ردة فعلها انها تشغل نفسها

وده طرقه بتختلف....ناس بتشغل نفسها بالشغل ...ناس باللعب واللهو وحقارة الدنيا وطرق التفريغ كتير

المهم احنا كده وصلنا ل معنى .....شأن يغنيه ....تمام؟؟

طيب ايه علاقة ده بالجواز ؟؟

الجواز برضو بيدخل كوسيلة

ازاى ؟؟

كتير من الناس ...شباب وبنات...او خلينا نتكلم على البنات عشان محدش يخانقنى ....بيحسو ان الجواز منقذ

منقد من اهلهم اللى تاعبينهم ...منقد من الدراسة ...منقد من قرف حاجات كتير....او على الاقل تغيييييير

مش تستغربوا انا مش ببص للموضوع بتشائم

فعلا ده بيحصل من غير من نحس....كوسيلة اننا نحسس نفسنا ان فى حاجة جديدة فى حياتنا ....حاجة تشغلنا ...عن واقع يمكن البعض مش فاهمه

تمام؟؟

طيب نرجع مرجوعنا تانى

معظم البنات عندهم الجواز حياة جديدة ...سعادة ...زوج ...حبيب ...راحة ...مشاركة...فسح وخروج...تحرر

جميل ...مقلتش حاجة

بس المشكلة اننا بنبص للجوانب المشرقة بس ...وتنويه هام....ممكن تكون مشرقة لفترة بس

طيب نرجع بقى لعنوان البوست .........أجمل ما فى الزواج ...الاستعداد له

تفسيره عن البنات ....كله جديد فى جديد

هدوم وشنط وجزم وبرفانات ولحاف السرير والصينى والتابلوهات وقائمة مش بتخلص

وكل الحاجات اللى كانت بتترفض من ماما زمان ...بتتجاب دلوقتى ..,العروسة بقى ...محدش يرفضلها طلب

انتى عايزة حماتى وهل جوزى يقولوا عليا ايه ؟؟

ده بالاضافه لبروفات فستان الفرح اللى ب 4000 ج والكوافير والماسكات اللى مش عارفة بكام؟؟

فى سركو موضوع بروفات الفستان ده متعة للعروسه ....انا مش بتريق بس بستغرب ...كل ده عشان ساعتين

انا غلست اوى صح؟؟معلش انا اسفة بس بحس ان لازم نضبط تفكيرنا فى الموضوع ده بجد

طيب

انا احساسى بعبارة ...أجمل ما فى الزواج ...الاستعداد له

الاستعداد لمعنى المشاركة بجد

عارفين المثلث...اللى هو 3 اضلاع ده ...

بحس ان الزواج كده

انتى بتربيتك واهلك ومستواكى الثقافى ضلع من المثلث ...وهو كذلك ...مهما حصل من توافق ...مش هيبقى زيك الضبط

المهم بقى ان ضلع المثلث الثالت يكون واصل بينكو انتو الاتنين ....مش يكون حادف فى ناحية تانية خالص

الاستعداد للحاجات للى مش تمام فيه ...وده طبيعى ...لأن كبنت هيبقى برضو فيا حاجات مش تمام

الاستعداد لحتواءه لما يضايق او يتنرفز ...واعرف امتى اتكلم وامتى اسكت

والعكس ...الاستعداد انك تفرفشى نفسك لو مضايقة عشان طول اليوم وشك فى وش الحيطة وهو جاى مبسوط ومنشكح

الاستعداد لام جديدة وعيلة جديدة ...ممكن مش تكون زى عيلتك اوى ....طبيعى

الاستعداد لتحمل مسئولية بيت(تنضيف ووغسيل ومكوى والذى منه) ....وميزانية ...و زوج ليه مطالب

ماما لو هتساعد شوية فى الاول ...بس دى مسئوليتنا فى النهاية

الاستعداد لطفل ممكن يجى ...ضعيييف اوى ومحتاجلك

مينفعش تتنرفزى عليه ...مينفعش تقصرى فى حقه ...مينفعش تقولى مش عايزة :)ز

حاجات كتير اوووى ...ونتيجتها ان فعلا الجواز وبنات اسرة حاجة مقدسة ....وصعبة

طيب بلاش كلام انشاء....نستعد ازاى ؟؟؟

اول حاجة اننا ندرك معنى الجواز بجد ...حمل تقيل بس جميل

نفهم انه مش لعبه...دى مسئولية هنتاحسب عليها

طيب برضو ازاى ؟؟

نحط الموضوع فى دماغنا ...ندرب نفسنا من دلوقتى

مقصدش نتعلم نطبخ ونكوى ....نقط مهمة بس فى حاجة اكبر

كتير بنتحط فى مواقف تنرفز ...حتى من اقرب الناس لينا

نركز ونتعلم منها نتحكم فى اعاصبنا ...نتعلم نسكت ...

نقرأ كتير فى كل حاجة

نفهم اللى قدامنا كويس....مش عيب انى اعرف بيحب ايه ومبيحبش ايه

وننسى العناد وتنشيفه الدماغ بقى

وفى مبدأ مهم جداااااا فى الجواز .....(مش عارفة انا ليه بتكلم كأنى متجوزة كده ...بس ما علينا ...انا بس بركز اوى فى معاملات اخواتى مع زوجاتهم ومع اللى حواليا بشكل عام)

اه المبدأ......عدى يا ليله ....عدى يا ليله

اوقات بجد لازم نفكر كده ....عشان مش اعمل تصرف ممكن اندم عليه

نقاط الاستعداد كتييير اوى ...اوى بجد...بس احنا مش واخدين بالنا

نتعلم التوفير وحسن التدبير واللباقة والشياكة فى عين جوزك

ومش محتاجه تدريب رهيب ولا حاجة ....مجرد ترويض للنفس او بمعنى اسهل....اخلى العادى بتاعى كده ...عشان مش اتعب لما اتحط فى الموقف بعد كده

تركيز بسيط فى حاجات حوالينا

اخر حاجة بقى

حاسيين بتناقض فى كلامى ؟؟؟

ازاى كل اللى بتوصفى ليه ده وتقولى اجمل ما الزواج الاستعداد له....ازاى اجمل؟؟

ايوة طبعا ...اجمل

عشان بتحسى بثمرة تعبك بعد كده....لا مش بتحسى ...انتى بتشوفيها قدام عنيكى

فى نجاح جوزك ....فى المودة والرحمة اللى بينكم ....بعد 25 -30 سنة فى فرح ابنك ...تحسى انك ربيتى بجد

انا صدعتكو اوى

حد فهم حاجة

فى النهاية ...ده برضو يعتبر كلام نظرى ...لأنى بنتكلم من منطق الملاحظة للى حواليا وغلطاتهم ...بس اكيد فى معانى اعمق من كده بكتير

نفسى اعرف رأيكم بجد

من الاحاسيس الصعبة

من الاحاسيس الصعبة

الشعور بالانتظار او الترقب لشء معين او حتى لرد فعل

الوقت بيعدى كأنه طووويل اوى

بس الواحد لو فكر فيها من جانب تانى هيلاقيها مختلفة

الحاجة اللى انا بستناها دى ...هفضل استناها علطول

ولا هى جاية جاية ؟؟

هتلاقى انك استنيت حاجات كتير وقلقت بسببها وفكرت واحترت

وبعد كده مش بقى ليها اى اهمية

حقا وكان الانسنان ظلوما جهولا

يااااااااااااااه ...يااااااااااااه

يااااااااه ......ياااااااااااه

نفسى اتكلم كتيييير اوووى ....بجد مش متصورين قد ايه

مش عارفة ابدأ منين

بس اول حاجة ....السلام عليكم ورحمة الله وبركاته

اخباركم ايه يارب تكونوا جميعا بخييير

فعلا مش عارفة ابدأ منين

امممممم

بجد صعب ان الواحد يحس انه عايز يتكلم بس مش عارف

اممممممم

الجاى فى دماغى دلوقتى عبارة واحدة بس .....القشة الى قسمت ظهر البعييير

اوقات كتير بنحسها اوووى

بيجى موقف صغير ويهد كل حاجة....رغم ان الواحد لو كان بره الموقف كان هيبقى تصرفه تانى

مش عايزه اقول غصب عنه ..بس يااارب تيجى العواقب سلييمه

المهم الواحد يحذر فى المواقف دى من ردود افعاااله

ايه تانى يا روضى

امممممم

اه افتكرت

يوم السبت اللى فات عملت عمليه الليزك

حسيت احساس غريب اووى

اوقات الواحد تكون هتخبطه عربيه ...تلاقى رد فعل منعكس ...يغمض عنيه

حد يخضه ....يغمض عنيه

حد يرشه بالميه ....يغمض عنيه

يشوف منظر وحش ....يغمش عنيه

حد عمره قال الحمد لله على النعمه دى

دى نعمه كبيرة اووى بجد ...ان لما تخاف تغمض عنيك

وانا فى العملية ...مكمنش خايفه بمعنى الكلمة ...لأنى الى حد كبير عارفه اللى بيحصل فيها

بس كنت فعلا عايزه اغمض عنيا ...مش خوف...بس مش عارفة اوصف الشعور اللى كان جوايا

حد فاهم حاجة ؟؟؟؟؟

ايه تانى ؟؟

اوقات الواحد بيحس انه عايز يتكلم ...مش عشان يحل مشكلة فى حد ذاتها ....لا ....عشان يخرج اللى جواه

مجرد اخراج مشاعر...ودى نعمه كبيره اووى

بس اوقات بتستحيل...يمكن عشان مش لاقى حد يتكلم معاه

يمكن عشان اللى قدامك بيقاطعك بسرعة وينصحك تعمل ايه ومتعملش ايه ؟؟

فالنتيجة ان الواحد بيؤثر الصمت ...المهم يقدر على نفسه :)

________________________________

بنت البواب عندها شهرين ...عندها ميا بيضا

فقبل ما بنعمل اي عمليه لازم نعمل تحاليل كتير ...فاكتشفوا كمان ان عندها فيرس سى

ربنا يشفيها ويعافيها يارب

كمان بنت خالى ابنها اتولد فى الشهر السابع ...اول يومين فى السابع

وزنه اقل من كيلو

وطبعا على جهاز تنفس صناعى

من كام يوم الهيموجلوبين قل ...فاضطروا ينقلوا ليه دم

الوضع صعب ...امه كل لما تشوفه كده نفسيتها تتأثر اوى

من اصعب الاحاسيس على النفس ان الاب او الام يشوفوا ولادهم بيتألموا ومش عارفين يعملوا ليهم حاجة

فعلا صعب وانا بشوووفه بعينى فى المستشفى

احساس بالعجز

ربنا يعافى الاطفال دول يااارب

المهم انا بحكى الحكايات دى ليه ؟؟

عشان حاجتين

اولا ::لما تيجى تبص حواليك ...هتلاقى الناس كلها عندها مشااااكل

فعلا هتتفاوت فى شدتها وقدرة الناس على تقبلها ...بس فى الاخر مشاكل ...ممكن ينتج عنها الم او حزن او هم

فكل واحد لما يفكر فى مشكلته ...يحسس نفسه ان اكيد فى مشكلة اكبر من مشكلته

فعلا مشكلته ممكن تكون كبيرة ...بس ادينا بنحاول

فلا ايه جميلة اوووى بتقول

انما تقضى هذه الحياة الدنيا

طبعا كلكم عارفين مين قالها والموقف اللى اتقالت فيه ؟؟؟

فعلا عميقه اوى

كل دقيقة بتعدى فى حياتنا بتقربنا اكتر من النهاية ...ودى مش حاجة وحشة ...المهم نكون مدركييين ده

تانى حاجة:: اوقات بنكون مضاااايقين واكتر ناس بيحسوا بينا بجد الام والاب...

فنحاول مش نحسسهم اننا مضايقيين ...كفايه الهم اللى هم شايلينه

______________________________

عارفين اجمل وقت بقضيه فى حياتى ....بقضيه فى المستشفى ...فعلا بجد

رغم ان بيبقى فى لحظات صعبه....بس بحس انى بطلع نفسى من اى مشاكل تانى حواليا وبعيش فى مشاكل الناس

الحمد لله ان ربنا وفقنى للمهنة دى

______________________________

فى موضوع ببقى نفسى اوى اتكلم فيه على المدونه ...بس بحس انه مش مناسب ....الجواااااااااااااااااز

ايه رأيكم ...عادى ولا ؟؟

_______________________________

فى حاجات الحمد لله باسطانى ...

سارة صاحبتى فى تركيا دلوقتى

وفاطمه لسه راجعه من الاقصر واسوان

ميين تانى

اه انا ...سافرت اسكندريه يومين ..

سفريه قلبت عليا المواجع بس الحمد لله

________________________________

اوقات الواحد يتحط فى موقف ويتصرف بشكل معين

ولما تدور عجله الزمن ويجى حد ياخد رأيه فى موقف شبيه بيكون رده فعله حاجة تانية خااااااااااااالص ....الاتجاه المعاكس بمعنى الكلمه

فنخلص من هذا ....ان ناخد بالنا بجد من تصرفاتنا

ونحاااول نقف ونفكر كويس اوى ...عشان مش نندم

لأن فعلا فى حاجات لو خسرتها مش هتتعوض تانى ابدا

على فكره كلامى ده ملوش معنى من غير موقف فعلى

بس فعلا مش لاقيه مثال مناسب اقوله

_______________________________

بقالى سنتين بعمل حاجة غريبة اووى

كل شهرين اعمل لوحه جديده

ايا كانت فكرتها ...ان شاء الله هنزلهم مره فى بوست

بس حاسه فعلا انى هخلص طب ومفيش مكان فى الاوضه

فعلا فعلا بتدخل تحس انها فصل مدرسه

بس اهو بيطلع شوية من الطاقة اللى جوايا

_____________________________

عدى يا ليله ....عدى يا ليله

شعار هاااااااام جدا

برضو فى نفس المواقف اللى لو اخدت فيها تصرف معين ...هتغير حاجات كتييير

______________________________

فى كلام كتير تانى

بس اخر حاجة عايزه اقولها لنفسى بالاخص

المهم انك بتاخدى الدوا الصح ....فمش تقلقى

مهما طال الوقت ..

ياااااااااااااارب

__________________________________

معلش فى حاجة كمان أخيره

اوقات الواحد بيبقى مضايق وعشان مش يحسس نفسه انه مضايق

يشغل نفسه ...يغط الطرف زى ما بيقولوا ....وبلغة الطبsymptomatic ttt

عدى يا ليله برضو

انا عن نفسى بقعد اسمع اناااشيد كتييير اوى ...وادخل فى ايفوريا

وبعدين اكتشف ان كل اللى بعمله ده ...امممم....اكنه مخدر موضعى

فبقيت بقلق على نفسى لما بعمل كده

فادعووولى لأنى دخلت فى المرحلة دى