اعمل ايه يابا ...الطب فى بلادى بقى خراااابة

ده مقال نثرى رااااااائع لصديقتى الرائعة Dr of feeling بتتكلم فيه عن حلمها فى دخول كلية الطب وعن الطب فى بلدنا ...وله جزء تانى راااائع هو كمان

هسيبكم تستمتعوا

أعمل إيه يابا...والطب في بلادي خرابه"

زمان وأنا صغير..كنت بقول يارب أدخل كلية الطب..

يارب يارب أبقى دكتور...وأفتح عيادة كده يتكتب فيها سطور وسطور..

وألبس بالطو أبيض وأملاه عطور...وأمشي كده في الشارع يركع ليا الحنطور..

وأمسك مقص ومشرط وألبس سماعه قال إيه دكتور...وخلق ربنا يضربوا تعظيم سلام للباشا الدكتور...

قعدت أذاكر وقلت ياواد لازم تبقى شطور...وتجيب مجموع عالي تدخل بيه طب ده العلم نور..

سنين تفوت وتفوت مافيش في دماغي غير"هو أنا هبقى دكتور؟"...وأخاف وأعيط لو حسيت بأي قصور..

واكتئاب بعيد عنك يارب ارحمني ودخلني كلية النور..ونسيت نفسي لا خروج ولا فسح ولا حتى كليب يخليني واد فرفور...

ويا عيني نظري راح ولسه الطب فاضلله بحور وبحور..بس معلش كله يهون مدام هبقى دكتور..

وفجأة لقيت نفسي في معمة ثانوية عامة والطب ماعدلوش غير شهور..قلت ياواد شد حيلك اهه هتبقى دكتور..

وإيمان وتقوى لأنه كله بإيد الغفور..وحالة طوارئ في البيت الواد عايز طب مش هندسة بترول....

والجيران تعاطفوا معايا ومعتش بسمع صوت البت بدور..ومدرسيين يشجعوا عايزيين ولادنا دكاتره من غير فزيتا تقسم ظهور...

وخلاص دخلت اللجنة وخايف أغلط يضيع مني حلم الدكتور..

جمدت قلبي وقلت ياواد اكتب سطور كيميا وفيزيا ماتخافش ده انت شطور...

خلصت امتحاناتي وعشت قلق النتيجة ولقب الدكتور...وصلاة ودعاء يارب ده أنا عبدك المكسور...

وطلعت النتيجة وكان يوم عيد وسرور...جبت 98 وكنت طاير بيهم زي النسور...وخلاص ياجماعة تقريبا بقيت دكتور..

والحمد لله اتحقق أملي اللي بقاله سنين منطور...

ويلا بقى أما نشوف طلبة الطب شكلهم زي أي دكتور..

والطب فعلا بينصح بزيت خالي الكولسترول..

دخلت الطب من الباب اللي جمب السور..وروحت للمدرج لقيت طلبة كتير بس الطب هيكفي دول ولا دول..

دورلك على مكان ياواد تقعد فيه خبط لزق قدام الدكتور..أهو لودخلت له شفوي يعرف إنك شطور..

بس مافيش مكان ولا حتى لحجمي الصغيور..هو أنا هقضي سبع سنين واقف كده على طول..

قلت معلش بكره تفرج ويزودوا المدرج كمان دور..خلينا بقى في شرح الدكتور..ومحاضرات وسكاشن بغياب وحضور..

قسمونا في السكشن بس لسه العدد مهول..قلت ياواد اصبر ده انت هتشرح بمشرط ولا جراح مشهور..

دخلت المشرحة وكنت خايف من الجثة زي البيبي الصغيور..لقيت مصر كلها جايه تشوف اللي ماقدرتش أشوفه ولا أطول..

قلت غريبة هو التكدس ده هيفضل على طول..ده الظاهر أيامي في الجامعة دي مش هتطول..

ماعلينا نشوف بقى مشكلة الطباشير والنور..بقينا في عصر الmultimedia بس الأصالة شئ مشكور..

والكهربا عماله تقطع مش عارف هو السد العالي مالوش أي دور..ياعم دي كماليات كفاية معاملتهم ليك كدكتور..

دكتور إيه دي معاملة يتكتب فيها سطور وسطور..

روح للشئون وانت هتعرف مين فينا الدكتور..يدوخوك السبع دوخات لحد ماترجع مشلول..

وتطبق الطب على نفسك وتعمل فيها دكتور..مش بقولك فعلا معاملة دكتور..

لأ انت بتفشر وبتفتري ع الناس دول..كفاية إن في الاخر بيبقى معاك شهادة دكتور..

تاني دكتور دي حتى شهادة ماينفعش بيها أبقى طور..لا بيها هشتغل ولا حتى أحضر في بلاد أشور..

ولو حصل وسافرت هبقى نملة جمب دكاتره عضلات وطول..وأبدأ من جديد هو العمر أنا عنه مسؤول

..معقول ياربي هو ده الطب في بلادي مصر بلد الحضارة والنور..

هيه دي مصر اللي كان بيجوها الغرب على الجمال والخيول..ده الظاهر المصريين أثر عليهم الفول..

ولا باين أنا اللي سرحت وخيالي وصل سابع دور..ماأنا كنت فاكر مصر زي ماسابها الأيوبي من قرون ودهور..

بس الظاهر شعبولا هو المنصور..والطب ده بقت موضة خلاص هتبور..

والله صعبان عليا نفسي والبلد،مش عارف أتكلم ولا أقف مسطول..

وقلبي بينزف دم ومش عارف مين المسؤول..

هقول إيه ولا إيه ده أنا جالي اكتئاب وبقولك هعمل فيه دكتور..

وهي دي بلادي يابا..الطب بقى فيها خرابة

طبيب ممزق

ماهية المشاركة فى المنتديات

كنت بفكر فى فايدة المنتديات بالنسبة ليا

قلت اسأل نفسى انا بدخل على المنتدى اعمل ايه؟

اقرأ مواضيع الناس واقول رأئى فى مواضيع النقاش
اعرف اخبار جديدة
اعمل مواضيع ليا
وشوية هزار

النقاش ...انا على قناعة انى بطلع منها زى ما انا ...مبغيرش رأئى
التانية ...اهى اخبار عادى
مواضيعى مش بحس ان حد بيستفيد منها

كتير كنت بسأل نفسى ليه محدش بيتفاعل معايا فى مواضيعى؟؟

ووصلت ان طبيعة مواضيعى ...خبرات حياتية شخصيةاو تذكرة دينية ...وصلتلها من تجارب او احساسات

فطبيعى ان اللى بيقرأ مش يحس باللى بقوله لأنه مش جربه

وبعدين جه فى دماغى سؤال...هل لو مكملتش مواضيعى دى هيبقى علم وحبسته عن غيرى؟

قلت لا ...النقطة ان التجربة خير برهان....انا وصلت للأفكار اللى فى دماغى دى بتجربة معينة

ولو حد جه قالى اعملى كذا وكذا انا جربته ...مش هحس بفايدته غير لما اختبره

طيب يا روضى فكرى فى الموضوع من الناحية التانية

بتخسرى ايه من القعدة على المنتديات ؟؟

كل مرة ادخل النت بسررررررعة افتح المنتدى
اقعد اقرأ وارد واضايق من الموضوع ده واضحك على ده...والوقت بيضيع

بعد الشهر اللى رجعت فيه المنتدى ..حسيت ان كل الحاجات التانية اللى بكون عايزة اعملها على النت بتاخد مرتبه تانية مع انها اهم

طيب خلاص ...خلصت كده...ابعدى عن الحاجة اللى بتعطلك

لأن بعد تفكير عميق فى الموضوع...مش بستفيد الاستفادة اللى بترضينى

خلاصة الموضوع::

المنتديات دى مرحلة انتقالية فى الاستفادة من النت ...مرحلة وبتخلص ...عشان تعدى للمرحلة اللى بعدها

انا صح ولا غلط مش عارفة

هغير رأئى ولا لا مش عارفة

يلا حالا بالا بالا حيوا أبو الفصاد

هيكون عيد ميلاده اليله أسعد الأعيـــــــــــــــــــاد


فلتحيا ابو الفصــــــــــــــــــــــــــــاد

كل سنة وإنت طيبة يا توأمتى الغالية ..وربنا يبارك في عمرك ويحقق كل أمانيك

Good Morning

withdrawal reflex

سلام الله عليكم ورحمته وبركاته

ازيكم يا جماعة

فعلا ليكو وحشة

بس معلش بقى هى الدنيا كده

فى جوايا كمية تساؤلات لا نهاية لها

فقررت اخد رأيكم فى الحاجات دى

ولكن الاول السؤال البديهى

هل الاأفضل البحث عن الاجابة

ام تفضيل الصمت والمضى قدما فى الحياة والانتظار حتى تأتى الاجابات الينا بنفسها

حاسة ان البحث عن الاجابات متعب وبيضيع معاه حاجات كتير عارفة اننا هنحس بعد كده انها اكثر اهمية

تنوية اولا :::::

هتحسوا فى كلامى بتناقض كبير جدا بس معلش استحملونى وادعولى تعدى على خير

اول سؤال::

ليه دايما لما بنيجى نسأل حد كبير وعاقل احنا ليه بنفكر كتير دلوقتى ومش عارفين نوصل لحل

وكل يوم بقرار

دايما بتكون الاجابة انه طبيعى فى السن ده

طيب لغاية امتى طبيعى

وايه الحل فى الى بيحصل ده ؟؟؟؟

هنفضل ساكتين على نفسنا كده

سامحونى

انا كمان معاكو ومش راضية عن الكلام اللى كتبته ده

بس معلش بقى

اترككم فى امان الله ويجمعنا حب الله

محدش يسأل عن العنوان او ايه علاقته بالموضوع

!!عزيزي المواطن بتاع النضال

من واقع إن الفكر السياسي لدى الشعب الآن أصبح هزلا..

والشعب بقى يطلع غلبه في النكت

فهذي رسالة من الحكومة لعزيزها المواطن!!

عزيزى المواطن بتاع النضال

يا راكب دماغك و غاوى الحلال

نصيحة يا صاحبى بلاش الخيال

و غمض عيونك و ربى العيال

بلاش المناكفة و لايم و عيش

هتتعب معانا و سهمك يطيش

نلفق لاهلك قضية حشيش

و تصبح حكاية و نكتة و مثال

تعالى و هاودنا و عدى الامور

و عيش فى الطراوة و خش الطابور

لكن لو هتزعل و دمك يفور

هنشهد نهايتك فى بحر الرمال

مالكش انت دعوة بايه اللى ضاع

و مين اللى شارى و مين اللى باع

و مين اللى كيل و مين اللى شال

فحب الحكومة و حب السلام

و علم ولادك يشدوا الحزام

علشان بكرة يابا هياكلو الحمام

و ينسوا الاسية و ينسوا الهزال

فلازم يا صاحبى تغمض عينيك

و طنش علينا نطنش عليك

و اياك تشاور هنقطع ايديك

و تصبح مواطن ما يسواش ريال

عزيزى المواطن بتاع النضال

يا راكب دماغك و غاوى الحلال

نصيحة يا صاحبى بلاش الخيال

وغمص عيونك وربي العيال

!!!!ولا عزاء للمواطنين

بالله نستعين

سلام الله عليكم ورحمته وبركاته

وحشتنى اوى المدونة والتعليقات وكل الحاجات دى

بس حصل تغييرات كتير مش بقيت بعرف ادخل النت

كل مرة اجى من السفر اقول هدخل انزل بوست ويحصل حاجة مش ادخل

وبعد تهديد ووعيد من توأمتى بغلق المدونة لو مش جريت نزلت بوست دلوقتى ...بسيحلك اهو

جيبت بقى وقولت مابدهاش

اول حاجة طبعا كل سنة وانتو طيبين بمناسبة عيد الفطر المبارك

وتقبل الله منا ومنكم ..

ايه اخبار الكحك والرنجة وكدا :)

ندخل على المفيد بقى

حسيت ان من حق مرتادى المدونة عليا انهم يعرفوا اخر اخبارى

نظرا لظروف عائلية وحلم من زمان برضو حولت عين شمس

لكن هناك الدنيا مبهدلة على الاخر

ومش عندى نت......بس انا متأكدة ان لو كان عندى حتى مكنتش هلاقى وقت ادخل

كنت برجع من الدروس الساعة 11-12 بليل

وكل سنتر فى مكان وبمواصلات مختلفة...ومن هنا لهنا

على ايه كل ده انا مش عارفة

لا والقاهرة كمان ...والمشى فيها غلس جدا ومختلف عننا كتير فى حاجات كتير

بس الحمد لله بجد ...ربنا سهلنا كتييير

اممممممم

ايه اخر الاخبار تانى ؟؟؟؟

اه افتكرت ..

............اخييييييييييييرا

اخويا اتجوز وارتحنا منه :)

عقبالكو كلكوووووووو نفرح فيكم بسرعة بقى

بس حسيت البيت فضى كده من غيره ...ونطلنا تانى يوم علطووووووووووول :)وعامل فيها عريس بقى

ربنا يسعده يااااااارب ويبارك له فى زوجته ويرزقهم الذرية الطيبة

.........................................

دى تقريبا اخر الاخبار

ومسافرة بكرة ان شا ءالله ومش عارفة هشوفكو تانى امتى ؟؟

فى امان الله اترككم وعلى حب الله القاكم

............................................