خواطر من لجنة الامتحان

قعدت مكانى وانا مش من عادتى اراجع فى اللجنة

كل الناس حواليا بيراجعو...حوارات مكررة بين الكل::

لحقت تخلص المنهج؟؟
هو مين لحق
الوقت كان ضيق اوى
م مش فاكرة حاجة من اللى راجعتها
السؤال ده متوقع
أسامة رسلان مش هيجيبها البر
محلتش اى اسئلة MCQ
يارتنى اجلت بكتريا
شايفة نص اللجنة مش موجودة

وانا سامعة كل ده وبفكر؟؟

بس زيهم ...كل لما افكر فى جزئية مش اعرف افتكر فيها حاجة

ودخلت فى حوار عنيف مع نفسى...

فجأة افتكرت يوم القيامة....امتحان الأخرة

ودخلت فى مقارنة بين امتحانى...وامتحان الأخرة!!!!...بين أية قرانية وشعورى؟؟؟

{ َيوْمَئِذٍ يَتَذَكَّرُ الْإِنسَانُ وَأَنَّى لَهُ الذِّكْرَى*يَقُولُ يَا لَيْتَنِي قَدَّمْتُ لِحَيَاتِي }الفجر24

{قالَ رَبِّ ارْجِعُون *ِلَعَلِّي أَعْمَلُ صَالِحاً فِيمَا تَرَكْت}المؤمنون100

ما هو ده اللى انتى بتقوليه لنفسك دلوقتى

اااااه لو الزمن يرجع بيا تانى ......مكنتش هضيع وقت
ااااه لو كنت اخدت مع الدكتور ده احسن

اااااه لو ذاكرت بالكتابة احسن
اااه لو كنت حضرت محاضرات بدل الدروس
اااه لو كنت ذاكرت بصوت عالى..كنت هركز اكتر
ــــــــــــــــــــــــــــــــــــــــــــــــــــــــــــــــــــــــــــــ
فعلا وقت الامتحان ...هو وقت الحساب

كل واحد بيحاسب نفسه::

قصرت فى ايه ؟؟السنة كلها عدت فى ايه ؟؟

ركزتى فى الشرح؟؟بذلتى جهد بجد؟؟

بس يوم القيامة حاجة مختلفة ....مش سنة وعدت....ده عمرك كله

زى ما يوم الامتحان انا قعدت افتكر.لما ضيعت وقت فى الخروجة دى

ولما مش ركزت فى السكشن ده ....

ولما أجلت الجزء ده ومش ذاكرته علطول

هفتكر يوم القيامة برضو ...انى عصيت ربنا

انى مش اتقيت ربنا فى الحاجة دى

انى حفظت القرأن ومش واظبت على مراجعته

انى قصرت فى حق الناس دى

والقائمة لن نتتهى.....هفتكر { بِمَا نَسُوا يَوْمَ الْحِسَابِ }ص26

ولقيت الورق بيتوزع.....حسيت انى مش هعرف احل حاجة ...فجأة الساعتين عدوا !!

رجعت البيت فعلا متأكدة انى هشيل المادة!!!

بعد لما الامتحانات خلصت ...وكلما يأتى كابوس البكتريا

...اقول مش مشكلة اديكى عندك فرصة تانية ...تذاكرى وتمتحنى دور تانى

بس امتحان الأخرة مفيهوش دور تانى

مفيهوش تأجيل مادة

مفيهوش انك تجاوبى سؤال كويس فالدكتور يعدى الجزء اللى سبتيه فى السؤال اللى بعده

مفيهوش انك خطك حلو...فالدكتور يتغاضى عن الشطب الكتير

مفيهوش توصية من قرايبك ولا حاجة

مفيهوش غش

فيه انك عملتى كذا وكذا وبتتحاسبى عليهم

{ هَـذَا مَا كَنَزْتُمْ لأَنفُسِكُمْ فَذُوقُواْ مَا كُنتُمْ تَكْنِزُونَ }التوبة35

طلعت من جولة التفكير دى بحاجتين::

ان السنة الجاية باذن الله هبذل جهد اكبر....هفتكر شعور الامتحان من أول السنة ...

هلاقى حزء صعب وأيأس ...بس الأهم ان باذن الله هقوم تانى

الترتيب راح السنة دى ....بس السنة الجاية فى أمل كبير

طيب والامتحان التانى ياروضى؟؟

بعد صمت نفسى طويل.....امتحان الأخرة...هفكر نفسى بيه على قد ما اقدر

هعمل له من دلوقتى ...عشان مش اندم بعدين

هخلى التقوى أهم معنى فى حياتى

هخلص فى عبادتى وعملى

هكون قدوة لغيرى

هكون من خيرة جند الله فى أرضه

عهود كتير ....كلام كتير....حماسة وعزيمة

أكييييييييد هقع ...هنسى...الدنيا هتاخدنى ...بس الأهم انى هقف تانى ...هفتكر تانى ...هتعلم من أخطائى

عايزة ادخل جوه حلة الضغط...المسماه بريستو

.اى نعم انا مقتنعة انى مختلفة عن باقى الناس...فى التفكير فى بعض الامور...او فى الاحاسيس ...شوية فى الافعال

بس مش عارفة الاختلاف ده للأحسن ولا؟؟

ونفسى اعرف بجد

هحكيلكو على موقف حصلى

امتحان الميكرو...البكتريا ...كان امتحان بشع بالنسبة ليا ...رجعت البيت مكلمتش حد لمدة 5 ساعات:(

وكان عندى الشفوى بعده بيومين...

قعدت اعيط وكنت متأثرة اوى...والدنيا كلها كلمتنى

تانى يوم ...قلت مش هذاكر بكتريا وهبدأ المادة اللى بعدها

الساعة 11 ...اذا بى اكتشف مسد كول من صاحبتى

اخخخ ...فى ايه يا دودو؟؟...اتصلت بيها

انتى فيييييين ؟؟احنا هندخل اللجنة خلااااص
لجنة ايه ؟؟

لجنة الشفوى
شفوى ايه هو مش بكرة؟؟
لالالا انتى معرفتيش انهم غيروا المواعيد بعد الامتحان(أصل حضرتى اخدت فى وشى بعد الامتحان ومشيت صاروخ)

طيب طيب انا جاية

(وسبحان الله كان يوميها عزاء احد رؤساء الوزرا ء الاسبقين...والريس كان جاى الجامع اللى جمب بيتنا...وقافلين شارعين تقريبا)

رحت قلت لماما ....وشها اصفر وجاب كل الألوان....يلا بسرعة انزلى . ...كلى دى عشان تركزى.....خدى تاكسى

وانا بقى انشكحت على الأخر...سعادة غريبة ...لبست واخدت ورق الشفوى اللى حضرتى مكنتش راجعته ونزلت

ماشية بالراحة ولا اكن عندى امتحان...

دخلت الكلية ...الناس كلها خلصت ومروحه وبيسألو بعض كل واحد اتسأل ايه؟؟.....عاااااادى ولا انا هنا

طلعت لقيت صاحبتى نازلة....عملتى ايه ؟؟

يعنى بتسأل فى كل حاجة ...انتى لجنة 54

دورت على اللجنة...وقفت قدامها اقرأ اى كلام (تحصيل حاصل)...

لقيت بنت تانية...اتسألتى ايه يا نورا؟؟....فى كذا وكذا وسبحان الله كنت مجمعة الجزء ده كويس

دخلت للدكتورة مبتسمة جدا(مش عارفة ايه العادة دى )...قالتلى ايوة كده انا بحب المبتسمين مش اللى داخلين مرعوبين منى

وسبحان الله سألتنى فى اللى كنت براجعه...جاوبته حلو

لا وكمان بقى قعدت اناقشها فى حاجات انا معترضة عليها كأدوية يعنى

خلصت ونزلت...وانا مروحة بقى لقيت الريس وصلJ

وخلونى امشى من شوارع ورااااا

المهم ....اللى اقصده بقى انى اكتشفت فى نفسى انى بحب اوى اكون ورايا ميت حاجة اعملها .

بحب اوى انى اكون تحت ضغط ....(زى موقف الامتحان ده)

بل بالعكس....بيجيلى اكتئاب لما بيبقى ورايا حاجات قليلة او مش لاقية حاجة اعملها

فى المذاكرة....بحب اذاكر الحاجات الجديدة ...مش عارفة ببقى عايزة اصعب على نفسى يعنى ولا ايه ؟؟

فى البيت ...بحب اوى انى اقلب البيت كله واوضبه تانى ...واجمع كل حاجة مع بعضها

(اختى بتضحك عليا لما بتلاقينى اقعد اجمع كل طقم معالق لوحده مثلا ..وتتريق:.يا بنتى ما كلهم بناكل بيهم )

تفتكروا ايه الحكاية دى ؟؟

هل ده اختلاف كويس ولا ؟؟؟

.......................................................................................................

اخر حاجة ؟؟

رباب(صاحبتى اوى )لما كلمتنى بعد امتحان البكتريا...قعدت اقولها ...انا هشيلهااااااااااااا

قالتلى كلمة حلوة اوى ....اصبرى ولا تجزعى واستنى شوفى ربنا مخبيلك ايه ؟؟

وسبحان الله ...جه امتحان الشفوى حلو اوى

مع ان باقى البنات اللى امتحنوا اليوم اللى بعديها دخلوا لدكتور ما يعلم بيه الا ربنا

ــــــــــــــــــــــــــــــــــــــــــوجبت فى الاخر جيد جداJ

اعمل ايه يابا ...الطب فى بلادى بقى خراااابة

ده مقال نثرى رااااااائع لصديقتى الرائعة Dr of feeling بتتكلم فيه عن حلمها فى دخول كلية الطب وعن الطب فى بلدنا ...وله جزء تانى راااائع هو كمان

هسيبكم تستمتعوا

أعمل إيه يابا...والطب في بلادي خرابه"

زمان وأنا صغير..كنت بقول يارب أدخل كلية الطب..

يارب يارب أبقى دكتور...وأفتح عيادة كده يتكتب فيها سطور وسطور..

وألبس بالطو أبيض وأملاه عطور...وأمشي كده في الشارع يركع ليا الحنطور..

وأمسك مقص ومشرط وألبس سماعه قال إيه دكتور...وخلق ربنا يضربوا تعظيم سلام للباشا الدكتور...

قعدت أذاكر وقلت ياواد لازم تبقى شطور...وتجيب مجموع عالي تدخل بيه طب ده العلم نور..

سنين تفوت وتفوت مافيش في دماغي غير"هو أنا هبقى دكتور؟"...وأخاف وأعيط لو حسيت بأي قصور..

واكتئاب بعيد عنك يارب ارحمني ودخلني كلية النور..ونسيت نفسي لا خروج ولا فسح ولا حتى كليب يخليني واد فرفور...

ويا عيني نظري راح ولسه الطب فاضلله بحور وبحور..بس معلش كله يهون مدام هبقى دكتور..

وفجأة لقيت نفسي في معمة ثانوية عامة والطب ماعدلوش غير شهور..قلت ياواد شد حيلك اهه هتبقى دكتور..

وإيمان وتقوى لأنه كله بإيد الغفور..وحالة طوارئ في البيت الواد عايز طب مش هندسة بترول....

والجيران تعاطفوا معايا ومعتش بسمع صوت البت بدور..ومدرسيين يشجعوا عايزيين ولادنا دكاتره من غير فزيتا تقسم ظهور...

وخلاص دخلت اللجنة وخايف أغلط يضيع مني حلم الدكتور..

جمدت قلبي وقلت ياواد اكتب سطور كيميا وفيزيا ماتخافش ده انت شطور...

خلصت امتحاناتي وعشت قلق النتيجة ولقب الدكتور...وصلاة ودعاء يارب ده أنا عبدك المكسور...

وطلعت النتيجة وكان يوم عيد وسرور...جبت 98 وكنت طاير بيهم زي النسور...وخلاص ياجماعة تقريبا بقيت دكتور..

والحمد لله اتحقق أملي اللي بقاله سنين منطور...

ويلا بقى أما نشوف طلبة الطب شكلهم زي أي دكتور..

والطب فعلا بينصح بزيت خالي الكولسترول..

دخلت الطب من الباب اللي جمب السور..وروحت للمدرج لقيت طلبة كتير بس الطب هيكفي دول ولا دول..

دورلك على مكان ياواد تقعد فيه خبط لزق قدام الدكتور..أهو لودخلت له شفوي يعرف إنك شطور..

بس مافيش مكان ولا حتى لحجمي الصغيور..هو أنا هقضي سبع سنين واقف كده على طول..

قلت معلش بكره تفرج ويزودوا المدرج كمان دور..خلينا بقى في شرح الدكتور..ومحاضرات وسكاشن بغياب وحضور..

قسمونا في السكشن بس لسه العدد مهول..قلت ياواد اصبر ده انت هتشرح بمشرط ولا جراح مشهور..

دخلت المشرحة وكنت خايف من الجثة زي البيبي الصغيور..لقيت مصر كلها جايه تشوف اللي ماقدرتش أشوفه ولا أطول..

قلت غريبة هو التكدس ده هيفضل على طول..ده الظاهر أيامي في الجامعة دي مش هتطول..

ماعلينا نشوف بقى مشكلة الطباشير والنور..بقينا في عصر الmultimedia بس الأصالة شئ مشكور..

والكهربا عماله تقطع مش عارف هو السد العالي مالوش أي دور..ياعم دي كماليات كفاية معاملتهم ليك كدكتور..

دكتور إيه دي معاملة يتكتب فيها سطور وسطور..

روح للشئون وانت هتعرف مين فينا الدكتور..يدوخوك السبع دوخات لحد ماترجع مشلول..

وتطبق الطب على نفسك وتعمل فيها دكتور..مش بقولك فعلا معاملة دكتور..

لأ انت بتفشر وبتفتري ع الناس دول..كفاية إن في الاخر بيبقى معاك شهادة دكتور..

تاني دكتور دي حتى شهادة ماينفعش بيها أبقى طور..لا بيها هشتغل ولا حتى أحضر في بلاد أشور..

ولو حصل وسافرت هبقى نملة جمب دكاتره عضلات وطول..وأبدأ من جديد هو العمر أنا عنه مسؤول

..معقول ياربي هو ده الطب في بلادي مصر بلد الحضارة والنور..

هيه دي مصر اللي كان بيجوها الغرب على الجمال والخيول..ده الظاهر المصريين أثر عليهم الفول..

ولا باين أنا اللي سرحت وخيالي وصل سابع دور..ماأنا كنت فاكر مصر زي ماسابها الأيوبي من قرون ودهور..

بس الظاهر شعبولا هو المنصور..والطب ده بقت موضة خلاص هتبور..

والله صعبان عليا نفسي والبلد،مش عارف أتكلم ولا أقف مسطول..

وقلبي بينزف دم ومش عارف مين المسؤول..

هقول إيه ولا إيه ده أنا جالي اكتئاب وبقولك هعمل فيه دكتور..

وهي دي بلادي يابا..الطب بقى فيها خرابة

طبيب ممزق

ماهية المشاركة فى المنتديات

كنت بفكر فى فايدة المنتديات بالنسبة ليا

قلت اسأل نفسى انا بدخل على المنتدى اعمل ايه؟

اقرأ مواضيع الناس واقول رأئى فى مواضيع النقاش
اعرف اخبار جديدة
اعمل مواضيع ليا
وشوية هزار

النقاش ...انا على قناعة انى بطلع منها زى ما انا ...مبغيرش رأئى
التانية ...اهى اخبار عادى
مواضيعى مش بحس ان حد بيستفيد منها

كتير كنت بسأل نفسى ليه محدش بيتفاعل معايا فى مواضيعى؟؟

ووصلت ان طبيعة مواضيعى ...خبرات حياتية شخصيةاو تذكرة دينية ...وصلتلها من تجارب او احساسات

فطبيعى ان اللى بيقرأ مش يحس باللى بقوله لأنه مش جربه

وبعدين جه فى دماغى سؤال...هل لو مكملتش مواضيعى دى هيبقى علم وحبسته عن غيرى؟

قلت لا ...النقطة ان التجربة خير برهان....انا وصلت للأفكار اللى فى دماغى دى بتجربة معينة

ولو حد جه قالى اعملى كذا وكذا انا جربته ...مش هحس بفايدته غير لما اختبره

طيب يا روضى فكرى فى الموضوع من الناحية التانية

بتخسرى ايه من القعدة على المنتديات ؟؟

كل مرة ادخل النت بسررررررعة افتح المنتدى
اقعد اقرأ وارد واضايق من الموضوع ده واضحك على ده...والوقت بيضيع

بعد الشهر اللى رجعت فيه المنتدى ..حسيت ان كل الحاجات التانية اللى بكون عايزة اعملها على النت بتاخد مرتبه تانية مع انها اهم

طيب خلاص ...خلصت كده...ابعدى عن الحاجة اللى بتعطلك

لأن بعد تفكير عميق فى الموضوع...مش بستفيد الاستفادة اللى بترضينى

خلاصة الموضوع::

المنتديات دى مرحلة انتقالية فى الاستفادة من النت ...مرحلة وبتخلص ...عشان تعدى للمرحلة اللى بعدها

انا صح ولا غلط مش عارفة

هغير رأئى ولا لا مش عارفة

يلا حالا بالا بالا حيوا أبو الفصاد

هيكون عيد ميلاده اليله أسعد الأعيـــــــــــــــــــاد


فلتحيا ابو الفصــــــــــــــــــــــــــــاد

كل سنة وإنت طيبة يا توأمتى الغالية ..وربنا يبارك في عمرك ويحقق كل أمانيك

Good Morning

withdrawal reflex

سلام الله عليكم ورحمته وبركاته

ازيكم يا جماعة

فعلا ليكو وحشة

بس معلش بقى هى الدنيا كده

فى جوايا كمية تساؤلات لا نهاية لها

فقررت اخد رأيكم فى الحاجات دى

ولكن الاول السؤال البديهى

هل الاأفضل البحث عن الاجابة

ام تفضيل الصمت والمضى قدما فى الحياة والانتظار حتى تأتى الاجابات الينا بنفسها

حاسة ان البحث عن الاجابات متعب وبيضيع معاه حاجات كتير عارفة اننا هنحس بعد كده انها اكثر اهمية

تنوية اولا :::::

هتحسوا فى كلامى بتناقض كبير جدا بس معلش استحملونى وادعولى تعدى على خير

اول سؤال::

ليه دايما لما بنيجى نسأل حد كبير وعاقل احنا ليه بنفكر كتير دلوقتى ومش عارفين نوصل لحل

وكل يوم بقرار

دايما بتكون الاجابة انه طبيعى فى السن ده

طيب لغاية امتى طبيعى

وايه الحل فى الى بيحصل ده ؟؟؟؟

هنفضل ساكتين على نفسنا كده

سامحونى

انا كمان معاكو ومش راضية عن الكلام اللى كتبته ده

بس معلش بقى

اترككم فى امان الله ويجمعنا حب الله

محدش يسأل عن العنوان او ايه علاقته بالموضوع