new begining

اوقات بحس انى نفسى ذاكرتى تتمسح وابدأ حياة جديدة

اوقات الانسان بتحط فى مواقف بتهزه جدا ...وممكن تأثر على حياته بشكل عام

فى قانون كنا واخدينه فى الفيزيا بيقول

لكل فعل رد فعل مساوى له فى المقدار ومضاد له فى الاتجاه

لكن فى حياتنا ...مش بيطبق...يمعنى اننا لما بنضايق بيتكون جوانا طاقة سلبية

البعض بيقدر يطلعها والبعض لا

فانا بقى قررت انى أبدأ صفحة جديدة مع نفسى

واعمل زى السمكة اللى فوق دى وانط من مجال التفكير الضيق اللى حاكمه نفسى بيه

ندخل على الموضوع بقى عشان مش اصدعكو

من أولى اولوياتى دلوقتى ....انهاء حفظ القرأن الكريم كاملا باذن الله
لما بفكر فى المذاكرة بحس اننا اوقات بطبيعة الدراسة...بنحفظ شكل الصفح

بيكون فى دماغنا الوصف ده اتكرر فى خمس أمراض

والدوا ده مش بنستعمله هنا وهنا وهنا

انا فاكرة السنة اللى فاتت منهج الفارما كان 800ص

طيب ازاى نعمل كده فى الدراسة وننسى القرأن

مع ان عندنا المهارات الكافية لحفظه

فبفكر كتير ايه الوسائل اللى ممكن تساعد فى كده

ممكن تكون حاجات كلنا عارفيها ...بس انا حيبت اقولها تانى عشان اركزها فى مخى ولو حد استفاد بيها يبقى الحمد لله
واخيرا عشان لو اى حد عنده تجربة او فكرة يضيفها معانا

أول حاجة (بس مش بترتيب الأهمية عشان بتختلف مش شخص لتانى على حسب بيتأثر بإيه فى ذاكرته)

· التفسير الموضوعى

بمعنى انك تفهم السورة بتتكلم عن ايه بشكل مجمل

@فى خواطر قرأنية للاستاذ عمرو خالد

اسلوبها سلس جدا وفيها ربط جميل اوى

ودا اللينكhttp://www.amrkhaled.net/sound_libaray/categories27.html#Scene_1

@كتاب ظلال القرأن لسيد قطب او كتاب التفسير الموضوعى لسور القرأن الكريم للإمام الغزالى

برضو نفس الفكرة ...وهى انه بيفسر السورة كموضوع مش كتفسير أيات

كتاب الظلال اسلوبه مفهوم
وللى عندهم خلفية لغوية كويسة ...هيعجبهم اوى كتاب الغزالى

ده لينك لكتاب الظلال بس للأسف لأول سبع أجزاء بس
।khayma.com/islamissolution/iis/zelal/fhrszelal.htm">http://www।khayma.com/islamissolution/iis/zelal/fhrszelal.htm

*تسميع مع صحبة

وبيتدرج فى المراتب من أول انى اتفق مع حد مثلا اننا نحفظ سورة كذا ونتابع بعضنا

لغاااية اننا نقعد كلنا فى حلقة وكل واحد يسمع ربع او صفحة

للناس بقى اللى مستوى حفظها عالى اوى...كل واحد يسمع أية ...بس لو حد معاهم نص نص ..هيكتئب فعلا

النقطة فى الموضوع ان النفس البشرية فيها جانب تنافسى ...وحب التفوق

*طبعا التسميع على يد شيخ او محفظ عشان التجويد والمتابعة بشكل عام

*الربط

مثلا الأيات دى بتلخبط فيها فأحاول أربطها بمكان سمعتها فيها ...بشخص سمعهالى ...بالتفسير بتاعها...بسبب نزولها

المخ له قدرة رائعة على الربط وفعلا فعاليتها عالية

*تبين متشابهة

ممكن برضو تندرج تحت الربط

بمعنى انى اقول فى الصفحة دى مثلا ..ذُكر خمسة نواهى

الأية دى ذكر مرتين فى السورة

أو مثلا :"وماذلك على الله بعزيز "ذكرت فى سورة فاطر وابراهيم بس بأسباب نزول مختلفة

الربط ده المخ بيقوم بيه لوحده مع تكرار المراجعة وجودة الحفظ الأخير بقلم

*الذاكرة البصرية

بتنفع معايا اوى انى احفظ أول أية من كل ربع واربطها بمكانها فى الصفحة

لو جربت الطريقة دى وغمضت عينيك ...هتلاقى كأن شكل المصحف قدامك وانت بتتخيل بداية كل ربع فين ...ونهايته فين !!

*الذاكرة السمعية

ناس كتير مش كانت حاطة فى دماغها حفظ القرأن بس من كتر السماع ..حفظوا

واحنا عندنا اوقات فاضية ...فى المواصلات مثلا او بين المحاضرات .
..ممكن تحط الهيد فون وتسمع السورة اللى بتحفظها ...
مع التكرار ..بتكون عارف حتى الشيخ اللى بتسمع له بيمد فيه وبيقرأ الأية دى بالطريقة كذا
التفسير

طبعا قراءة تفسير السورة واسباب النزول بتوضح جدا المعنى

تفسير السعدى اسلوبه جميل *
http://www.al-eman.com/IslamLib/viewtoc.asp?BID=321

*صلاة حفظ القرأن

فى بعض الناس قالت ان حديث ده مش مؤكد عن الرسول

بس قلت اجيبها برضو لغاية ما أتأكد تانى

عن ابن عباس رضى الله عنهما :قال بينما نحن عند رسول الله اذ جاءه على بن أبى طالب فقال :بأبى انت تفلت هذا القرأن من صدرى فما أجدنى أقدر عليه فقال له رسول الله يا أبا الحسن أفلا اعلمك كلمات ينفعك الله بهن
قال اذا كان يوم الجمعة ,فإن استطعت ان تقوم فى ثلثها الأخير فانها ساعة مشهودة فصل أربع ركعات تقرأ في الركعة الأولى الفاتحة و( يس ) وفي الثانية الفاتحة و( الدخان ) وفي الثالثة الفاتحة و( السجدة ) وفي الرابعة الفاتحة و( الملك ).
فاذا فرغت من التشهد فاحمد الله وصل وسلم على وأحسن وعلى سائر النبيين والاستغفار للمؤمنين والمؤمنات ولإخوانك الذين سبقوك بالإيمان.ثم قل فى أخر ذلك
اللهم ارحمني بـِتَركَ المَعَاصِي أبداً مَا أبقيتني, وَارحَمْنِي أن أتَكلَّف ما لا يَعْنِيني, وارزُقنِي حُسْنَ النَّظَرَ فِيما يُرضِيكَ عَنِّي, اللهم بَدِيعُ السمَاواتِ والأرض ذا الجَلالِ والإكرام والعِزِّة التي لا تُرَام, أسألكَ يا الله يا رحمن بـِجلالِكَ ونُور وجهِكَ أن تُلزِمَ قلبي حِفظَ كِتَابـِكَ كَمَا علَّمتَنِي وارزُقنِي أن أتلوه على النَّحوَ الذي يُرضِيكَ عنِّي, اللهم بَدِيعُ السمَاواتِ والأرض ذا الجَلالِ والإكرام والعِزَّةِ التي لا تُرام, أسألكَ يا الله يا رحمن بـِجَلالِكَ ونُورِ وجهِكَ أن تُنَوِّر َبـِكِتَابـِكَ بَصَرِي وأن تُطلِقَ بـِهِ لِسَانِي وان تُفَرِّجَ بـِهِ عن قَلبي وأن تَشْرَح بـِهِ صَدْرِي وأن
(تُغسِلَ بـِهِ بَدَانِي فإنَّهُ لا يُعِينَنِي على الحقِ غَيْرُك ولا يؤتِيهِ إلا أنت ولا حولَ ولا قوةَ إلا باللهِ العَلِيُّ العَظِيم

يا أبا الحسن تفعل ذلك ثلاث جمه او خمسا أوسبعا تجاب باذن الله

قال ابن عباس :فوالله ما لبثت على الا خمسا او سبعا حتى جاء رسول الله فقال يارسول الله انى كنت فيما خلالا اخد الا أربع أيات ونحوهن فاذا قرأتهن على نفسى تفلتن ،وأنا أتعلم اليوم أربعين أية ونحوها فاذا قرأتهن على نفسى فكأن كتبال الله بين عينى

*فى طبعا كمان التسميع الكتابى

على حسب كل شخص وطريقة استقباله

فى الماضى كانوا ا لا يحفظون إلا على الألواح التي يكتبونها بخط يدهم أمام شيخهم. حتى إننا إلى عهد قريب في الريف كنا نسمي النص المحفوظ بـ "اللوح". وقد تحتاج إلى تكرار الكتابة لتقوية وتثبيت الحفظ.


دى الوسائل اللى ساعدتى انى احفظ واكرر ॥يارب تكونوا استفدتوا
ونفسى بجد حد يشاركنى تجربته فى الحفظ

وادعولى اوى ان ربنا يكرمنى واكون من حملة كتابه
___________________________________________

اضافة ::)

دا لينك لبوست نزلته فى رمضان عن القرأن عن نوايا ومحفزات للحفظ

ويارب يوفقنا جميعا

http://dorob-life.blogspot.com/2008/09/2.html