السلام عليكم ورحمة الله وبركاته
انهرضة عايزة اتكلم فى موضوع غريب شوية
الا وهو السيطرة النسائية
فى فترة العشرين تلاتين سنة الأخرنين ظهرت النساء فى كل مجالات الحياة بمعنى الكلمة
اختى فى كلية فنون جميلة .....عندهم حفلة للأوائل ... عشرين على مستوى الأربع سنين...منهم ولد واحد بس
اول ما دخلت سنة اولى ...كان كل اللى بيديونا ستات ...ستات ....بجد كانت حاجة مش حلوة
لما وصلت رابعة اكتشفت الرجالة راحو فين؟؟....معظمهم فى الاقسام الاكلنيكية
مش عارفة انا بقول كده ليه....مع انى المفروض انتمى الى هؤلاء
تلاقى دايما الناس مش بيحبو يرحوا لدكتورة....تسألهم ليه عشان اكيد مش شاطرة
فى احساس بعدم الثقة
يمكن عدم تقبل لدخول المرأة عالم العمل الفعلى لأن فى قناعة داخلية ان مكانها تكوين الأسرة
مش عارفة ...بس ده لا يمنع ان فى ناس عملت موازنة رائعة ونجحت فى الاتنين
انا بحس انى اول ما الاقى دكتورة داخلة المحاضرة ....لسان حالى بيقول ...انسى انك تفهمى حاجة انهرضة يا رضوى
طبعا دى مش قاعدة خالص ...بس دا الكونسبت اللى فى نفسى
كل لما اقول لحد كده ...يقولى انتى بتفكرى كده ازاى مع انك المفروض هتطلعى دكتورة
يعنى مش هتكونى واثقة فى نفسك؟؟؟؟؟
مش عارفة بصراحة ...بس بفكر فى الموضوع كتير !!!
مش هسأل هل ممكن الست تقدر تثبت نفسها ولا لأ؟؟ لأن فى نماذج فعلية
بحس ان مهما كانوا ديفوتت للشغل بس بيبقى فى حاجة ناقصة
او يمكن انا يكون عندى مشكلة ثقة فى الستات
بس لازم نعترف بحاجة ان الستات بيتحملوا المسئولية كويس وقادرين فعلا على تنظيم حاجة بشكل جيد
فى عندنا حاجة اسمها وحدة الجودة فى الكلية ...اللى ممشينها كلهم دكاترة فيميلز...يمكن برضو عشان هما اللى فاضيين
مش عارفة ...بس فعلا عملو جهد فوق الراااائع
حاسة ان البوست ده متلخبط اوى ...حد فهم حاجة فى الأخر
10 comments:
أنا فهمت طبعاً...:)
هي الفكرة ان الدكاترة الستات بعضهم مش كويسين أكيد مش حاجة في الجينات بتاعتهم مثلاً.
هم فعلا أحيانًا كتيرة بيكونوا مشتتين مع الأولاد والزوج والمسئوليات.
يعني صعب ان حد يبني نفسه ومعاه تلاتة كمان بيساعدهم يبنوا نفسهم.
بس أنا متفقة معاكي ان اللي بيثبتوا نفسهم بالرغم من كده أكدوا انهم أكفاء زيادة عن المألوف فعلاً.
تعرفي حضرتك ان معظم المتفوقين حاليا من النساء اعتقد ان الفتره الجايه المفهوم ده هيغير بل ربما تيجي بعض المخاوف من الرجال علشان الاستهتار
يعني ايه عنوان البوست أولا ؟
سمر
انشكحت جدا لما شفت ردك
حلوة حته الجينات دى :)
م.حسن
فعلا معظم المتفوقين من النساء
انا حاساها حواليا
وحاسة ان الفترة الجاية هما اللى هيكونوا ماسكين زمام امور اكتر
بس دى حاجة قلقانى جدا
مش عارفة انا ازاى بقول كده مع انى واحدة منهم
!!!!!
عنوان البوست يا باشمهندس اشاش
ان هقول حاجة مش متوقع انها تطلع منى
يعنى المفروض انا انتمى الى هؤلاء متكلمش عنهم كده
بس يعنى
ايه رأيك انتى بقى ؟
النساء بيميزهم حاجة ...لما بيحطوا فى دماغهم حاجة بيعملوها
نسبة الحاجات اللى ممكن تلهيهم اقل كتير من الرجال
مش عارفة بس بفكر فى الموضوع ده كتير
ماشاء الله كلام عاقل جدا وقليل انه يطلع من بنت :)
وانا بستغرب جدا الناس اللي مبتحبش ان الرجاله تطلب من زوجاتهم تبعد عن العمل وكده وتكتفي ببيتها !!
اولا بيتها ده مش حاجه تقل من قيمتها ابدا!!! دي ممكلتها والاولاد والبيت والزوج ده عبء كبير جدااااا وبيتشال بالعافيه!! مش عارف ازاي تشيل هم فوق الهم
تاني حاجه هو فيه حاجه احسن من كده يعني ؟ ده بيطلب منها انها تبقى ملكه في بيتها ومعززه مكرمه وبيصرف عليها عشان عايز يحافظ عليها بعيدا عن الناس !! وكمان عشان اكيد الشغل بياثر على البيت بدرجات مختلفه..
وعشان بيحبها وعايز يحافظ عليها :)
وبالنسبه لانها تثبت نفسها.. متهايلي مهمااااا اشتغلت ومهما وصلت.. عمرها ما حتقدر تثبت نفسها ولا تكون سعيده ربع ما حتكون سعيده لما تطلع ابنها راجل وبنتها بنت الناس بتحلف باخلاقها وانها تخلي جوزها مش شايف من بنات حواء غيرها..
بوسته جميله ماشاء الله :)
عارف اني شرخت شيويه بره النقطه بتعتك بالظبط بس اتكلمت في عموم الموضوع :)
ومستنين البوستات الجديده :)
بصى هقولك حاجة الحياة اجمل ما فيها ان يكون فى مشاركة فعالة بين الراجل والست فى كل مناحى وجوانب الحياه المختلفة مش بس فى البيت وانجاب الاولاد ورعايتهم لا كمان فى الشغل لكن لازم نعرف ونتاكد ان فى شكل ينفع لطرف وما ينفعش للطرف تانى حسب طبيعة الحد او الطرف دا فسيولوجيا زى بعض الاعمال اللى بتحتاج لمجهود عضلى كبير زى مثلا اعمال البناء والتشيد والرفع والمهن البسيطة دى اللى بتطلب مواصفات خاصة ماتنفعش مع طبيعة المراة الرقيقة وان كنا فى هذا الزمن قد اصبحنا فى مجتمع المراة الحديدية والمراة الساطور
يعنى المراة المسترجلة بالعربى عادى دى حرية لكن ياريت نفهم بجد يعنى ايه عمل يليق بطبيعة كل انسان زى ما ربنا خلقه يعنى زى ماالراجل ما ينفعش يشتغل مرضعة او شغالة او حتى رقاصة كمان الست ماتنفعش تدخل اى مجال مش مجالها وتحارب الراجل فيه على الفاضى وعلى المليان
وانا فعلا معاكى ومش لوحدى معايا زميلات والله لو كان لنا مصلحة فى مكان معين وكان الموظف اللى هيخلص المصلحة دى واحدة ست بنقول فى حس واحد خربت وباظت المصلحة مش لحاجة غير ان زى ما قولتلك لو فهمنا يعنى ايه تعاون ومشاركة حقيقى بجد ويعنى ايه حد يدى كل اللى عنده للحد التانى وما يخبيش عليه معلومة او فكرة ويوصله لنهاية الطريق بسلام اكيد لو دا حصل سواء من راجل اوست هيبقى فى اختلاف
فهمتى حاجة؟
Post a Comment