عندما....

اولا احب ابارك لكل الناس على الاجازة

وعقبالكو لما النتايج تظهر:)

كتير اوى بنحس اننا مضايقيين ...فحبيت اشارككو بعض افكارى وانا مضايقة محاولة فى الهروب من الضيق بالتفكير

حاجات كتير بنكون عارفينها لكن مش بنعرف نتجاوز من حد المعرفة الى مجال الفعل

عارفيين ان المفروض نبذل اقصى جهد ومش نضيع وقت ....

عارفيين ان المفروض نخلى القراءة عادة....

عارفيين ان مش لازم نبص لأحزان الماضى ونكمل طريقنا!!!

عارفين ان دى احلى سنين حياتنا ...مفيش التزامات ...مفيش مسئوليات ...

عارفين حاجات كتير اوى بس مش كلها فى دماغنا فى كل وقت ..عشان تهون علينا يعنى

لما بفكر فى الناس الكبار شوية فى السن .....بقول لنفسى يارضوى هيجى عليكى الوقت اللى عايزة تعملى فيه حاجات ومش هتقدرى

فاعملى دلوقتى وانتى قادرة ...عشان هيجى اليوم اللى عايزة ومش قادرة

______________________________________________________

وانا مضايقة دلوقتى ...قعدت اجيب صور لناس مشوهيين...عندهم اطراف مقطوعة...مقعديين

ناس عندهم مشاعر واحلام ...بيفكروا وعندهم رضا غريب بجد...اللهم بارك

رغم اللى فيهم بس عندهم أمل ...عندهم ايمان قوى ...متمسكيين بحلمهم اوى

لما بفكر فيهم بحس انى تحت اوى ...الحمد لله ربنا انعم عليا بالصحة والعقل....بس اوقات بضيع كل النعم دى فى لحظات ضيق او زهق !!

فعملت فولدر عندى فيه صور كده ...وسميته اتقى الله

بس بجد اوقات مش بقدر ...كأنى متكتفه

__________________________________________________

اوقات بنحس انى لوحدى اوى ...وبفكر كتير اوى ...اكتر من اللازم

انفكر فى حاجات كانها منقذة ليا من الوحدة !!بس لما الحاجة دة تتحقق...ملقيش انها بالصورة الحالمة الرائعة اللى كنت حاطاها

فاللى طلعت بيه...ان مش لازم استنى حاجة...همشى فى طريقى زى ما ربنا كاتبه

ياربى لك الحمد

سلام الله عليكم ورحمته وبركاته

من زمان مش كتبت حاجة ...كنت مشغولة فى حاجات كتير॥منها الشرعى طبعا بس الحمد لله خلصته وبدأت الأنف والأذن

ما علينا

انهرضة بعد ما صليت الفجر قعدت ادعى شوية واحفظ وردى ...جالى خاطرة غريبة اوى ومخيفة

انى عمرى ما حمدت ربنا انه نزل على سيدنا محمد القرأن ...دايما بدعى انى اكون من حملة القرأن ...وحاسة انه نعمة كبيرة انى احفظه بس عمرى ما كنت فكرت لو مكنش عندنا كتاب من ربنا اسمه قرأن كنت هعمل ايه!!!

يااااه كام مرة كنت مضايقة ومسكت المصحف أقرأ فيه!!

وكام مرة احس بمعنى أيه اوى كأنى عمرى ما قرأتها قبل كد!!

وكام مرة بقرأ سورة واعرف اسباب نزلوها واتعلم حاجات كتير اوى !!

لو كل ده كان مش موجود...يااااه ...كنا خسرنا وتعبنا اوى اكتر مااحنا تعبانين

فياربى لك الحمد ان رزقتنا كتابا من عندك ।تهدى به نفوسنا ॥وتفرج به عنا

ياربى كيف أحمدك وحمدى لك نعمة تستحق الحمد

انا عارفة ان حاجات كتير موجودة فى حياتى وعمرى ما حمدت ربنا عليها ....بس بجد لما فكرت فى القرأن ...وانى عمرى ما حمدت ربنا عليه ...كوجودة معانا مش كحفظ ...حسيت انى اترعبت بجد

عساكم من عواده

ازى كل المدونين والمدونات طبعا

كل سنة وانتم طيبين وعيد سعيد علينا جميعا

انا من زمان فعلا مش دخلت بس متابعة من بعيد

اوقات الواحد بيحس انه عايز يغير الروتين بتاعه

يغير حاجات فى نفسه..كده يعنى !!!

الحمد لله خلصت اول راوند عندى.... الرمد

بجد بجد كان مميز جدا ...وأول مرة يعملو الامتحانات على مرضى فى الرمد

كانت جديدة علينا اننا نتعامل معاهم بس استفدنا كتير ونزلنا العيادة

والنتيجة ظهرت الحمد لله

وبدأت راوند شرعى ...طبعا شتان بين هذا وذاك

بس يعنى اهو

بيتملكنى احساس غريب ॥مش عارفة اتخلص منه ॥يمكن احساس بالتوهان

وحاسة انى حياتى بتحول لروبوت

بفكر بصورة اوفر

بتوصل احيانا للاجهاد فعلا

خير اكيد

يارب كلكم تكونوا بخير

حيثيات التعامل مع الناس

فى مناقشة عقيمة مع صديقتى بحب الحرية عن التعامل مع الناس

رضوى:انا عندى مشكلة فى التعامل مع الناس بشكل عادى
وبقيت حاسة انى بحب اكتر اكون لوحدى

حرية:طبيعى ان كلنا بيجيلنا فترة بنحب نكون فيها لوحدنا لكن انه يكون مبدأى فى
حياتى .....لا.....لازم زى ما بتدى تاخدى

رضوى:انا الحمد لله بحب اساعد الناس اوى بس بحس ان مفيش فايدة اقول لحد على اللى مضايقنى

حرية: العمل الجماعى احسن بكتير من انك تشتغلى لوحدك
هو فى القرأن ربنا بيقول يا أيها الذى أمن ...ولا بتبقى بصيغة الجماعة

رضوى: طيب لما يبقى تعاملى مع الناس بعمق بسببلى ضيق

حرية:ربنا بيقول يا أيهاالناس يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُواا

رضوى:طيب تخيلى معايا كده..صحيتى بليل لوحدك..اهلك نايمين..صحابك مش هتكلميهم دلوقتى ...مين اللى ممكن تكلميه غير ربنا
فليه بقى ألجأ لبشر ومساعدتهم مش هتكون زى ربنا؟؟

حرية:جميل الثقة فى الله والتوكل عليه بس دا من حق البشر عليكى وربنا هيحاسبك

رضوى:ايوة بس " {وَكُلُّهُمْ آتِيهِ يَوْمَ الْقِيَامَةِ فَرْداً }مريم95...يعنى محدش هينفع حد فى الاخر
{‏فَالْيَوْمَ لَا يَمْلِكُ بَعْضُكُمْ لِبَعْضٍ نَفْعًا وَلَا ضَرًّا

حرية:لا انتى كده تفكيرك غلط

رضوى:طيب هحكيلك على اللى حصلى ...من سنة ونص تقريبا كان كل صحباتى يعرفوا مشاكلى...وقفوا جمبى...دعولى...كانوا بيسالوا عليا
بعد لما المشاكل دى خلصت ...كل واحد رجع تانى لحاله...محدش بيسأل على حد

حرية :تقصدى ان كده ممكن الواحد يبدأ يفتعل مشاكل عشان يلاقى اللى بيحبهم جمبه

رضوى:مش المعنى بالضبط...فاللى عملته بعد كده انى اقلمت نفسى انى لوحدى...حد محتاجنى فى حاجة اكيد هيلاقينى معاهم
حرية: طيب ليه مش بتفكرى ان الناس دى عندها ظروف او حاجة شاغلاها

رضوى:لا فكرت طبعا...مرة كنت بصلى واختى بتنادى عليا...بعد ما خلصت صلاة فكرت ان زى ما انا سامعة اختى بس مش عارفة ارد عليها ...ممكن الناس برضو تكون دى ظروفهم

حرية: مينفعش الواحد يتقوقع على نفسه وبس

رضوى:انا عارفة انى غلط..بس مش قادرة اغير ده دلوقتى ..وعندى أمل انها فترة وتعدى

حرية:يمكن بسبب طبيعة كليتك؟؟

رضوى :مش عارفة ...بس ممكن عشان الكل مشغول فى حاله