عيد سعيد

ربنا يتقبل منا الصيام والقيام والدعاء وصالح الاعمال ويغفر لنا ولجميع المسلمين ... آآآمين ..ااه بالنسبة للعيد طيب اولا طبعا مننساش التكبير في ليلة العيد اللي هي انهارده صيغة التكبير الله اكبر الله اكبر ....... لا اله الا الله الله الكبر الله اكبر ولله الحمد ثلاث مرات ,, ويقول بعدها الله اكبر كبيرا والحمد لله كثيرا وسبحان الله بكرة واصيلا لا اله الا الله ..تمام كده ,, بس وبعد صلاة الفجر لازم من غسل العيد وكمان الافطار على تمر وترا ,, ودي سنة النبي صلى الله عليه وسلم ,, وبعدها على مصلى العيد .. وطبعا يستمر على التكبير لحد ما يصلي العيد مع الناس ويقعد يستمع الخطبة وبعدها يسلم على الناس ويعيد عليهم ويرجع من طريق غير الطريق اللي راح منه نسيت أقول ان زكاة الفطر لازم تكون قبل صلاة العيد ويفضل انها تخرج الليلة ..مهم جدا ,, ما تنسوش الموضوع ده ..بس وبعد الصلاة نعيد على الاهل والاحباب

ياليته لم يكن عجل لى شيئا من دعائى

يارب انجح...يارب السنة دى تعدى على خير
يارب ارزقنى الشغل ده
يارب اشفى فلان
يارب ارزقنى الزواج من .....


بندعى وبنحس باخلاص اوى فى الدعاء


لكن اوقات ربنا مش بيستجيب...وفلان يموت...والشغل يضيع ....

طيب عارفيين الحديث ده::

عن النبي صلى الله عليه وسلم قال يدعو الله بالمؤمن يوم القيامة حتى يوقفه بين يديه فيقول عبدي إني أمرتك أن تدعوني ووعدتك أن استجبت لك فهل كنت تدعوني فيقول نعم يا رب فيقول أما أنك لم تدعني بدعوة إلا استجيب لك فهل ليس دعوتني يوم كذا وكذا لغم نزل بك أن أفرج عنك ففرجت عنك فيقول نعم يا رب فيقول فإني عجلتها لك في الدنيا ودعوتني يوم كذا وكذا لغم نزل بك أن أفرج عنك فلم تر فرجا قال نعم يا رب فيقول إني ادخرت لك بها في الجنة كذا وكذا قال رسول الله صلى الله عليه وسلم فلا يدع الله دعوة دعا بها عبده المؤمن إلا بين له إما أن يكون عجل له في الدنيا وإما أن يكون ادخر له في الآخرة قال فيقول المؤمن في ذلك المقام يا ليته لم يكن عجل له في شيء من دعائى

سبحان الله ...يعنى يوم القيامة مش هنكون اى حاجة من اللى ربنا استجاب لينا فيها عشان ربنا يكون اخرها لينا فى الاخرة

........................
الشغل ده من رابع المستحيلات انى اتقبل فيه
الزوجين دول ..خلاص صعب اوى يكون فيه بينهم صلح
انا شايل السنة دى شايلها


كلها مواقف من وجهة نظر صاحبها مستحيل تتحقق

طيب مادام انت متأكد انها مش هتحصل ...ادعى برضووووو

عشان ربنا يدخرها لك فى الجنة

اوقات كتير بكون عارفة ان اللى بدعيه مش ممكن يتحقق ...ما هو خلاص كله انتهى

بس بدعى برضو عشان هحتاجها بعدين
مداخلة بسيطة...هو اللى انا بعمله ده تحايل على ربنا؟؟

موووول

تخيلوا كده معايا..

بقالنا 20 يوم بنذاكر فارما مثلا وخلاص بقى امتحنا وخلصنا

نطلع كلنا نخرج ...نروح فين؟؟

مووووووووول عشان الدنيا حر

فى المول وانتى ماشية ما صحباتك تتفرجى على المحلات

دى حلوة ودا شيك ودا هيليق على مش عارفة ايه عندك

مش تنسى تقولى دعاء السوق

لا اله الا الله وحده لا شريك له له الملك وله الحمد يحيى ويميت وهو حى لا يموت بيده الخير وهو على كل شئ قدير

ولو بقى افتكرتى شوية تسبيح او تهليل هينطبق عليكى الحديث ده

قال رسول الله صلى الله علية وسلم(عبادة فى الهرج والفتن كهجرة الى)

مرة واحنا ماشيين فى سوق ..لقيت راجل بيقول بصوت عالى الله اكبر...سبحان الله

استغربت منه جدا ...ما اللى عايز يستغفر ما مع نفسه

لما كبرت بقى عرفت حديث جميل اوى

فان ذكرني في نفسه ذكرته في نفسي وان ذكرني في ملئ ذكرته في ملئ خير منهم. حديث متفق عليه

(طبعا الكلام ده للشباب بس)

انا حبيت اتكلم عن موضوع المولات...عشان فى ناس كل اسبوع لالالالازم يروحوا سيتى ستارز(بكرهه)

مش بقول مش نروح...لكن حتى لا يكون وبالا علينا
...............................................

بنسمع الحوارات دى كتير

احمممممد ...قوم من على الكمبيوتر وانزل هات العيش

ساااااااارة ..وانتى جاية هاتى معاكى كيسين ملح

وبما اننا اوقات بننزل متتضريين...وهى كلها 10 دقايق

فافتكروا برضو دعاء السوق

لا اله الا الله وحده لا شريك له له الملك وله الحمد يحيى ويميت وهو حى لا يموت بيده الخير وهو على كل شئ قدير

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اوقات كتير بروح مول وانا مش عايزة ...قهر بقى :)

فالواحد بدل ما يقعد يشغل نفسه ووقت يضيع ...يسبح ويذكر الله

لما تبص فى المراية

دايما

...واحنا فى البيت معدين كدا قدام المراية....أكيد بنبص على فيها

وتتوالى العبارات::وشى مش رايق خالص انهرضة

عايزة اغير الكريم ده*

قبل ما ننزل من البيت لازم نبص فى المراية ...نضبط هندمنا كده وننزل(حلوة هندام ده صح ):)

وخصوصا البنااااات ...عشان يضبطو الحجاب وكده ...*قبل النزول من البيت

*بين السكاشن والمحاضرات....كده يعنى )

ممكن يكون بداعى او من غير داعى

طيب عايزين نفتكر مع بعض الدعاء ده

اللهم كما أحسنت خَلقى ....فأحسن خٌلقى
................................................
بسم الله ماشاء الله ....اللهم بارك

عشان اوقات الواحد يبص على المراية كدا يقول فى نفسه ...ايه الحلاوة دىJ

فممكن حتى يحسد نفسه !!!!

فى قولين كمان ليهم نفس المعنى تقريبا

كان ص اذا نظر فى المرأة قال:"الحمد لله الذى حسن خَلقى وخٌلقى وزان منى ماشان من غيرى"رواه

وكان ص يقول:"الحمد لله الذى سوى خَلقى فعدله وكرم سورة وجهى فحسنها وجعلنى من المسلمين"رواه ابن السنى

____________________________

انا حاسة بوست انهرضة عبيط جدا ...بس انا فعلا بنسى أقول الدعاء ده...فقلت افكركو انتو كمان

كمان نقطة اننا لو عودنا نفسنا على حاجة ...هتفضل معانا

واهى حسنات بتجيلينا من حيث لا ندرى:)

أنا لك اليوم من وراء كل تاجر....الحلقة 2

كتير اوى بنتمنى نتم حفظ القرأن...بس الزهق ...اليأس...الانشغال...النسيان

كل دى اسباب نتجيتها ...اننا نحفظ شوية وننسى ....وفى دايرة مفرغة

كل سنة اقول انا هتم حفظ القرأن السنة دى ...فحبيت رمضان ده يكون بداية همة وحماسة ...فقت اشاركو همتى:(

عارفين حياتنا كأنها خريطة ... معالمها ::دنيا...نزع الروح...القبر...البعث...الحساب

هتلاقى القرأن كأنه شخص ماشى معاك فى كل محطة منهم...تعالو نشوف

حزن تعب=دنيا

نستريح فيها ازاى؟؟
واحد هيرد الحل هو ان الانسان يبقى واضح مع الناس ..وفى قراراته

هتلاقى أية من القرأن بترد عليه تقول { قَدْ جَاءكُم بُرْهَانٌ مِّن رَّبِّكُمْ وَأَنزَلْنَا إِلَيْكُمْ نُوراً مُّبِيناً }النساء174

هَذَا بَصَائِرُ لِلنَّاسِ

حد تانى هيقول...ان حياتى تبقى سعيدة..مليانه حاجات تبشرنى ان الجاى احلى...بشرى....هنقوله... {وَي وَنَزَّلْنَا عَلَيْكَ الْكِتَابَ تِبْيَاناً لِّكُلِّ شَيْءٍ وَهُدًى وَرَحْمَةً وَبُشْرَى لِلْمُسْلِمِينَ }النحل89

وقال عليه الصلاة والسلام..".ان القرأن مأدبة الله ,من أحب القرأن فليبشر"

حد تالت هيقول..الحل فى تعب الدنيا ...هو الذكر...هنقوله ان القرأن أفضل الذكر وان { {إِنْ هُوَ إِلَّا ذِكْرٌ لِّلْعَالَمِينَ لِمَن شَاء مِنكُمْ أَن يَسْتَقِيمَ }التكوير

ده دور القرأن فى الدنيا...راحة..نور..تصبير..بشرى...

تعالى نشوف ..*عند الموت ونزع الروح

بالقرأن تقدر تقرر خاتمتك...ببساطة لأن احوج ما يخون اللسان صاحبه عند الموت

لكن اللى هيكون متعود مش هيكون عنده مشكلة ببساطة برضو لأن يموت المرء على ما عاش عليه ..ويُبعث على ما مات عليه

*فى القبر

وفي رواية ، قال :" يؤتى الرجل في قبره ، فإذا أتي من قبل رأسه دفعته تلاوة القرآن ، وإذا أتي من قبل يديه دفعته الصدقة ، وإذا أتي من قبل رجليه دفعهمشيه إلى المساجد"

*على الصراط

متخيلينه؟؟ صراط على ظهر جهنم، على حافتيه خطاطيف وكلاليب، فيأمرنا سبحانه أن يمروا على ظهره، فيشتدُّ الموقف، وتعظم البلو،

على قد حفظك القرأن فى الدنيا هتكون سرعتك على الصراط فى الأخرة


قال رسول الله صلى الله عليه وسلم : (( يجئ القرآن يوم القيامة كالرجل الشاحب يقول لصاحبه : هل تعرفني ؟ أنا الذي كنت أسهر ليلك ، وأظمئ هواجرك ، إن كان تاجراً من وراء تجارته ، وأنا لك اليوم من وراء كل تاجر فيعطى الملك بيمينه ، والخلد بشماله ، ويوضع على رأسه تاج الوقار ، ويكسى والده حلتين لاتقوم لهم الدنيا وما فيها ، فيقولان : يارب ! أنى لنا هذا ؟فيقال : بتعليم ولدكما القرآن

حاسسين بالكلام ده ؟؟؟

كتير ما بنزعل والدنا او والدتنا ....

لو الواحد حط فى دماغه بس انه يحفظ القرأن عشان يكرمهما فى الأخر ...دى لوحدها كفاية

اوقات فى ناس كتير بنكون بنحبهم وبندعليهم بالهداية لكن ...انك لا تهدى من احببت ولكن الله يهدى من يشاء

طيب ايه رأيكم نكون سبب فى دخولهم الجنة ؟؟
قال رسول الله {ص} : " من قرأ القرآن وتلاه وحفظه أدخله الله الجنة , وشفعه في عشرة من أهل بيته ؛ كلُُ قد وجبت له النار " -البخاري-


*الميزان....

متخيلين عامل ازاى...عندما تراه الملائكة تقول...سبحانك نا عبدناك حق عبادتك

!!!!احنا بقى هنقول ايه ؟؟ياليتنى قدمت لحياتى

بعد الخريطة اللى شفناها والقرأن معانا !!هتفرط فى الحفظ؟؟هتقاوح؟؟

انا عارفة انى صدعتكو بس باقى كلمتين

::
في الحديث الصحيح: بينا رسول الله صلى الله عليه وسلم جالس إذ أقبل ثلاثة نفر, فأما أحدهم فوجد فرجة في الحلقة فدخل فيها, وأما الاَخر فجلس وراء الناس, وأدبر الثالث ذاهباً فقال رسول الله صلى الله عليه وسلم: «ألا أنبئكم بخبر الثلاثة, أما الأول فآوى إلى الله فآواه الله, وأما الثاني فاستحيا فاستحيا الله منه, وأما الثالث فأعرض فأعرض الله عنه».

احنا عايزين نبقى كلنا الرجل الأول

ارٍ الله من نفسك خير

السلام عليكم ورحمة الله وبركاته

كل سنة وانتم طيبين ورمضان كريم علينا وعليكم باذن الله
كنت مترددة كتير انزل اى حاجة فى رمضان ولا لأ!!عشان الوقت يعنى

قعدنا نحاول نتفق على اى حاجة مفيدة ننزلها كحلقات

كانت فكرتى ان رمضان فرصة فى ان الواحد يبدأ بداية جديدة॥فى أى حاجة

فى حديث جميل اوى بيقول ..إن لكل عمل شرة، ولكل شرة فترة، فمن كانت فترته إلى سنتي فقد اهتدى، ومن كانت إلى غير ذلك فقد هلك‏
شرة ::يعنى نشاط او همة...

معنى الحديث ان بداية كل عمل جديد بيكون معاها حماسة ...فالانسان اذا استغل الحماسة دى فى سنة الرسول ...فقد اهتدى

ايه رأيكم نستغل حماسة رمضان ...بحيث انه يكون بداية جديدة

مش هنعمل حاجة مستحيلة يعنى!! ...هنحاول بس مش نخلى كل يوم يعدى كده ॥زى اللى قبله

هنحاول اى وقت كان بيعدى كده ...هباءا منثورا...ناخد فيه أجر بحاجات بسيطة اوى

ممكن نكون بنعملها ...ممكن نكون عارفينها وناسينها ...المهم نوصل منه لنقطة التعود

لو بدأنا وعودنا نفسنا فى رمضان...هتفرق!!

بفكر ان الحلقات تاخد لقطات من الحياة العامة ...ونحاول نضيف ليها المعانى اللى عارفينها ومش حسناها قبل كده
مش هطول فيها ...هيبقى معنى صغير اوى عشان مش تزهقوا
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

تخيلوا معايا كده راجعة من الكلية ...طالعة السلم ...فتحت الباب ودخلت البيت ودخلت على الأوضة
१०

دقايق عدو من حياتى من غير ما أخد فيهم ولا حسنة

طيب رجعوا الشريط لورا وتخليوا تانى
·

راجعة من الكلية ....وانا طالعة السلم بقول الله اكبر....عن جابر رضي الله عنه قال‏:‏> [ كـُـنـّا إذا صعدنا كبـَّرنا، وإذا نزلنا سبَّحْـنا‏]‏
·

دخلت البيت بقول....بسم الله ولجنا وبسم الله خرجنا وعلى ربنا توكنا
وسورة الصمد
·

سلمت على أهل البيت .... فَإِذَا دَخَلْتُم بُيُوتاً فَسَلِّمُوا عَلَى أَنفُسِكُمْ تَحِيَّةً مِّنْ عِندِ اللَّهِ مُبَارَكَةً طَيِّبَةً كَذَلِكَ يُبَيِّنُ اللَّهُ لَكُمُ الْآيَاتِ لَعَلَّكُمْ تَعْقِلُون }النور६१

ممكن نكون بنعمل كده ...بس اهى تذكرة:)

تابعونااااا...انا حبيت بس أبدأ بحاجة بسيطة:)

كل سنة وانتم بخير

حيثيات التعامل مع الناس

فى مناقشة عقيمة مع صديقتى بحب الحرية عن التعامل مع الناس

رضوى:انا عندى مشكلة فى التعامل مع الناس بشكل عادى
وبقيت حاسة انى بحب اكتر اكون لوحدى

حرية:طبيعى ان كلنا بيجيلنا فترة بنحب نكون فيها لوحدنا لكن انه يكون مبدأى فى
حياتى .....لا.....لازم زى ما بتدى تاخدى

رضوى:انا الحمد لله بحب اساعد الناس اوى بس بحس ان مفيش فايدة اقول لحد على اللى مضايقنى

حرية: العمل الجماعى احسن بكتير من انك تشتغلى لوحدك
هو فى القرأن ربنا بيقول يا أيها الذى أمن ...ولا بتبقى بصيغة الجماعة

رضوى: طيب لما يبقى تعاملى مع الناس بعمق بسببلى ضيق

حرية:ربنا بيقول يا أيهاالناس يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُواا

رضوى:طيب تخيلى معايا كده..صحيتى بليل لوحدك..اهلك نايمين..صحابك مش هتكلميهم دلوقتى ...مين اللى ممكن تكلميه غير ربنا
فليه بقى ألجأ لبشر ومساعدتهم مش هتكون زى ربنا؟؟

حرية:جميل الثقة فى الله والتوكل عليه بس دا من حق البشر عليكى وربنا هيحاسبك

رضوى:ايوة بس " {وَكُلُّهُمْ آتِيهِ يَوْمَ الْقِيَامَةِ فَرْداً }مريم95...يعنى محدش هينفع حد فى الاخر
{‏فَالْيَوْمَ لَا يَمْلِكُ بَعْضُكُمْ لِبَعْضٍ نَفْعًا وَلَا ضَرًّا

حرية:لا انتى كده تفكيرك غلط

رضوى:طيب هحكيلك على اللى حصلى ...من سنة ونص تقريبا كان كل صحباتى يعرفوا مشاكلى...وقفوا جمبى...دعولى...كانوا بيسالوا عليا
بعد لما المشاكل دى خلصت ...كل واحد رجع تانى لحاله...محدش بيسأل على حد

حرية :تقصدى ان كده ممكن الواحد يبدأ يفتعل مشاكل عشان يلاقى اللى بيحبهم جمبه

رضوى:مش المعنى بالضبط...فاللى عملته بعد كده انى اقلمت نفسى انى لوحدى...حد محتاجنى فى حاجة اكيد هيلاقينى معاهم
حرية: طيب ليه مش بتفكرى ان الناس دى عندها ظروف او حاجة شاغلاها

رضوى:لا فكرت طبعا...مرة كنت بصلى واختى بتنادى عليا...بعد ما خلصت صلاة فكرت ان زى ما انا سامعة اختى بس مش عارفة ارد عليها ...ممكن الناس برضو تكون دى ظروفهم

حرية: مينفعش الواحد يتقوقع على نفسه وبس

رضوى:انا عارفة انى غلط..بس مش قادرة اغير ده دلوقتى ..وعندى أمل انها فترة وتعدى

حرية:يمكن بسبب طبيعة كليتك؟؟

رضوى :مش عارفة ...بس ممكن عشان الكل مشغول فى حاله