دخلت كلية الطب دى بطريقة غريبة جداااا
لغاية 2ث ...كان كل اللى يقولى طب ...اقول لالالا هو انا مجنونة؟؟!!....طب من بقك
وكان كل اللى مالى دماغى هندسة ...هندسة ...هندسة...واخدت كيمياء فى تانية
وبما ان بابا مهندس فمش راضى انى ادخل هندسة...وكتبولى غصب عنى علمى علوم
قلت ماااشى ..هعديها السنة دى بس فى تالتة هغير الرغبات يعنى هغيرها
طلعت نتيجة تانية ..والحمد لله جبت 98ونص % ولسه مصرة على رياضة
سافرت ومعايا كتب رياضة 2...واتفقت مع المستر وخلااااص هنبدأ بعد يومين
وبابا وماما كانوا خلاص رضخوا لمطالبى وهنغير الرغبات
قلت اعمل استخارة ...بنية طاعة الوالدين...مش هخسر حاجة
سبحان الله ...تانى يوم لقيتنى مش مستريحة خالص لأنى اكمل رياضه
كأن دماغى اتقلبت 180 درجة
قعدت اتصل اشوف فى مدرسين أحياء فى الرياض ؟؟فى الاخر لقيت دكتور زراعة بس بيدى أحياء
وجبت كتاب أحياء طبعة قديمة اوووى
فعلا بجد كان كل اللى حواليا بيقولوا ايه اللى حصل ...اقولهم مش عارفة ...انا مش مستريحة لرياضة خالص
مع التنوية انى بعشق الريااااضة وحل المسائل وكده
كانت سنة صعبة مع الدكتور ده ...لأنه مش عارف الاسئلة بتيجى ازاى !!
وبعدين لقينا مدرسة بس بتدى فى اى جى ...لغات
اخدنا معاها بعد معاناة عشان توافق
وكمان كانت مشكلة شوية فى الترجمة
مع ان بابا وماما كانوا عايزنى احياء ...بس مش اللى شافوه من معاناة ...جم على نص السنة وقالولى حولى رياضة
والمستر هيشتغل معاكى وتلحقوا تخلصو
بس انا اصريت على موقفى وقلت هكمل السنة للأخر
الحمد لله كملت احياء ومع ان الامتحان كان صعب بس الحمد لله
استنيت النتيجة والتنسيق ظهر والحمد لله جالى طب الحمد لله
كان أول رغبة ليا طب عين شمس بس للأسف مجتش عشان التوزيع الجغرافى
لأن كان حلمى اكون خريجة عين شمس
وسبحان الله بعد سنتين حولت عين شمس وباذن الله حلمى يتحقق
على طول المسيرة الدراسية ...اكيد كان فى صعاب كتير وتعبنا كتير وحسيت بأحاسيس فعلا صعبة
بس فى الاخر مواقف جميلة وسايبة فيا اثر رائع
بس بجد كل لما افتكر الموقف ده ودخلت الكلية ازاى !!!
احس ان دراسة الطب مقدرة ليا مع انى عمرى ما فكرت فيه ولا كان حلمى
بحس ان دى ممكن تكون وظيفتى فى الحياة .... او رسالتى اللى عايشة عشانها
فبقول لازم اصبر على اى حاجة مهما كانت ...لأنها فى الاخر حاجة بحبها ايا كان الطريق ليها
حبيت افكر نفسى بالموضوع ده ...يعنى كوسيلة للثبات
12 comments:
الحمد لله
وعسي ان تكرهوا شيئا وهو خير لكم
:d
ان شاء الله حضرتك تكوني معيده في طب
السلام عليكم
خواطر جميلة يا دكتورة تحمل اسمى معانى الرضا
ربنا يكرمك فى دراستك يارب ويلا سلام
الانسان ما ياخذ الا نصيبه
وما يشوف الا المكتوب له دايما
والله يختار لنا احسن الاشياء
مع تمنياتي بالتوفيق لطبيبة المستقبل:)
اثبتى أختنا
الطب مفيش أحسن منه
و سنة رابعة ظريفة إن شاء الله
و ربنا يعينك
و فيه أمور مقدرة قبل أن يخلقنا الله
و ما نفعل إلا أن ننظر الأقدار
د.حماس
جميله اوي الحكايه
لو دورتي هتلاقي ناس كتير كدا
ربنا يوفقك يا دكتوره
تحياتي لروحك الحلوه
قعدت اتصل اشوف فى مدرسين أحياء فى الرياض ؟؟فى الاخر لقيت دكتور زراعة بس بيدى أحياء
دا الظاهر انك كنتي بقى في الرياض
بلدياتي يعني
المره الاولى ما خدتش بالي من الرياض دي
صحيح
المدرسين في الرياض كتير مش احياء (:
يظن الكثيرين أننا نختار طريقنا
ولكن فى الحقيقه طريقنا
هو الذى يختارنا
المهم أن نكون فاعلين ومؤثرين
مدونتك رشيقه
وأستمتعت بتجوالى فى أركانها
وسأعود لأستكمال جولتى
وتقبلى تحياتى ومرورى وتجوالى
هيا اقدار
انا كمان كان نفسى ادخل اعلام بس منه لله المجموع اللى دخلنى طب بقى:))
وادينى اهو نايب قصر عينى
يلا كلنا لها:))
انا اريد وانت تريد والله يفعل مايريد
شارك في الحملة الشعبية للقي بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
دعوة لصيام يومي الأثنين 24/11 - 1/12 والدعاء لإخواننا في غزة والتبرع بثمن وجبة الافطار لأهالينا في غزة
والي عايز يشارك يسجل معانا في حملتنا بوضع البانر في مدونته والمشاركة في الجروب ويدعو الناس كلها للمشاركة معانا
هدفنا 1.000.000 مسلم يدعو ويتبرع لاخواننا الرقم سهل ونقدر نحققه بس عايز تعاون وجدية
والي ميقدرش يصوم يوم يصوم التاني بس لازم نصوم من اجل اخواننا في غزة
البانر علي المدونة
www.bahebalhorea.blogspot.com
http://www.facebook.com/group.php?gid=37720052122
كل سنه وجضرتك طيبه وبخير يترب
Post a Comment