فى مناقشة عقيمة مع صديقتى بحب الحرية عن التعامل مع الناس
رضوى:انا عندى مشكلة فى التعامل مع الناس بشكل عادى
وبقيت حاسة انى بحب اكتر اكون لوحدى
حرية:طبيعى ان كلنا بيجيلنا فترة بنحب نكون فيها لوحدنا لكن انه يكون مبدأى فى
حياتى .....لا.....لازم زى ما بتدى تاخدى
رضوى:انا الحمد لله بحب اساعد الناس اوى بس بحس ان مفيش فايدة اقول لحد على اللى مضايقنى
حرية: العمل الجماعى احسن بكتير من انك تشتغلى لوحدك
هو فى القرأن ربنا بيقول يا أيها الذى أمن ...ولا بتبقى بصيغة الجماعة
رضوى: طيب لما يبقى تعاملى مع الناس بعمق بسببلى ضيق
حرية:ربنا بيقول يا أيهاالناس يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُواا
رضوى:طيب تخيلى معايا كده..صحيتى بليل لوحدك..اهلك نايمين..صحابك مش هتكلميهم دلوقتى ...مين اللى ممكن تكلميه غير ربنا
فليه بقى ألجأ لبشر ومساعدتهم مش هتكون زى ربنا؟؟
حرية:جميل الثقة فى الله والتوكل عليه بس دا من حق البشر عليكى وربنا هيحاسبك
رضوى:ايوة بس " {وَكُلُّهُمْ آتِيهِ يَوْمَ الْقِيَامَةِ فَرْداً }مريم95...يعنى محدش هينفع حد فى الاخر
{فَالْيَوْمَ لَا يَمْلِكُ بَعْضُكُمْ لِبَعْضٍ نَفْعًا وَلَا ضَرًّا
حرية:لا انتى كده تفكيرك غلط
رضوى:طيب هحكيلك على اللى حصلى ...من سنة ونص تقريبا كان كل صحباتى يعرفوا مشاكلى...وقفوا جمبى...دعولى...كانوا بيسالوا عليا
بعد لما المشاكل دى خلصت ...كل واحد رجع تانى لحاله...محدش بيسأل على حد
حرية :تقصدى ان كده ممكن الواحد يبدأ يفتعل مشاكل عشان يلاقى اللى بيحبهم جمبه
رضوى:مش المعنى بالضبط...فاللى عملته بعد كده انى اقلمت نفسى انى لوحدى...حد محتاجنى فى حاجة اكيد هيلاقينى معاهم
حرية: طيب ليه مش بتفكرى ان الناس دى عندها ظروف او حاجة شاغلاها
رضوى:لا فكرت طبعا...مرة كنت بصلى واختى بتنادى عليا...بعد ما خلصت صلاة فكرت ان زى ما انا سامعة اختى بس مش عارفة ارد عليها ...ممكن الناس برضو تكون دى ظروفهم
حرية: مينفعش الواحد يتقوقع على نفسه وبس
رضوى:انا عارفة انى غلط..بس مش قادرة اغير ده دلوقتى ..وعندى أمل انها فترة وتعدى
حرية:يمكن بسبب طبيعة كليتك؟؟
رضوى :مش عارفة ...بس ممكن عشان الكل مشغول فى حاله
17 comments:
الحاجة اللى انا مستتغربة منها انى عمرى ما كنت كده
ومش قادرة احدد مع نفسى ايه السبب فى كده اوى!!
هل ده لقلة ثقة فى الناس ...بسبب مواقف اتعلمت منها
ولا لخوف من ان الناس تحكم عليا بحاجة مش فيا
ولا خجل
؟؟؟؟؟؟؟
شكرا ل د.جمعاوى على الاستشارة التدوينية
الحمد لله المدونة رجعت الى الحياة:)
حبيبتى رضوى تجننى والله بجد
عجبنى جدا اسلوب الحوار ده وكأن الواحد بيتكلم ويضاد نفسه
وعايزة اقولك حبيبتى انتى تقريبا وصفتينى فى البوست ده وكتير كلمت نفسى فى الحكاية دى بس فى النهاية اتعودت اكون لوحدى وبقيت اعتمد على نفسى يمكن فى اوقات كتير ده مش بيكون صح بس بقى موضوع تعود
وبجد بجد البوست تحفة واستشهادك بالقرآن الكريم واسلوبك نفسه ربنا يبارك فيكى وللامام دايما
السلام عليكم يا دكتورة ويا رب تكون مشكلتك مع كتابة البوستات اتحلت
وبالنسبة لنفسوياتك المرة دى فأنا أحب أقولك إن انا السنة اللى فاتت كنت باعيش نفس المشاعر دي حتى كان شعارى الذى كنت ارفعه السنة اللى فاتت
iam alone here
وكانت شواهد الموضوع نفس الشواهد اللى انتى بتحكى فيها بالضبط
بس أحب أقولك انى بعد فترة اتغيرت مشاعرى دي كلها مش عارف ايه اللى حصل علشان التغيير ده يحصل المهم انه حصل وفعلا حسيت انى انا الى كنت غلطان وكانت ناس كتيييييير بتيجي تطرق بابى وانا منفض على الاخر
ربنا يارب يكرمك كده وتخرجى من الموود ده
ودمتى لنا بخير ويلا سلام
السلام عليكم ورحمة الله وبركاته
أولا احييكي علي اسلوب حوارك وبجد من غير مجامله انا بحب اقرأ موضوعاتك لان اسلوبك ظريف.
أما بقي عن الموضوع المهم اللي حضرتك بتتكلمي فيه فهقول لحضرتك : ان الانسان عمره ما هيعرف يعيش لوحده منفرد عن الاخرين ، بل ان هناك بعض الاحتياجات للانسان بيبقي محتاج حد يؤديهاله ومش هيقدر يقوم بيها لوحده برضو زي ما الناس احيانا بتحتاجلك في عمل معين او مساعده، ولكن في نقطه مهمه جدا الا وهي ان الواحد مننا هيغلط غلط كبير جدا لو استني رد فعل معين من الناس او من الشخص اللي ساعده دا ، فممكن جدا تكون اهمية المساعده دي بالنسباله مش كبيره بالدرجه زي ماهي عندك ، وبالتالي هيكون شكره ليكي مش زي ما توقعتي ، فساعتها لو فعلا منتظره رد فعل معين ومكنش هو نفسه ،ممكن بسهوله جدا تضايقي بل وربما تحبطي وتحسي ان الناس دي كلها وحشه ومش بيعرفو يقدرو كويس.
مغزي كلامي : ان الانسان لا ينتظر الشكر ابدا من الناس او انهم يعاملوه بالمثل ، لأن لو الانسان كان ماشي بالفكر دا ، هيبقي كدا غير مخلص لله في اللي بيقدمه لغيره ، فالاصل ان الواحد منا بيفكر في كل حاجه هو بيعملها قبل ما يعملها هو بيعملها ليه وعلشان مين ، لو كان لله يبقي خير كبير جدا وهيجزي من الله ثواب اكبر بكتيييير من اي شكر من اي انسان .دا بالنسبه لتقديم مساعده للناس .
أما بالنسبه عن مخالطة الناس اصلا فزي ما قلت لحضرتك مفيش انسان يقدر يعيش لوحده ربنا خلقنا اصلا مختلفين عن بعضنا علشان نتعارف ، لكن في فرق كبير جدا بين تعاملي مع اصحابي ومع جيراني ومع الناس الغريبه، كتير مثلا بنسمع كلمة انسان "ساذج" ليه بقي الساذج دا قالو عليه كدا ؟؟؟ لأنه مش بيعرف يتعامل مع الناس صح وبيكون سهل جدا يضّحك عليه , قصدي ان المؤمن كيس فطن بيعرف يتعامل مع كل واحد زي ما المفروض يتعامل معاه علشان ميصدمش من الناس دي لما يلاقي تصرف لا يليق مع شخصيته.
أرجو اكون قدرت اوصلك فكرتي.
ومن رأيي ان دي فتره وهتعدي وهتستفيدي منها جامد ان شاء الله ومش هتتكرر تاني.
تقبلي تحياتي
رورووو
للنقاش بقية طوييييييييييلة
بس نتقابل إن شاء الله
تحياتي ..وبورك فيك
هاف دكتورة:)
عارفة الحوار ده بيجى فى دماغى كتييير جدا
مبسوطة جدا ان البوست عجبك وفعلا سعيدة جدا انى اتعرفت عليكى
د.جمعاوى
ربنا يكرمك ...الحمد لله المشكلة اتحلت ..جزاك الله خيرا
يااارب الموضوع البعد عن الناس ده يخلص بجد...لأنى فى قرارة نفسى حاسة انى غلط ..بس مش قادرة اغير حاجة
...وشكرا على المتابعة
باشمهندس الترافايلوت
اشكرك جدا على الزيارة الطيبة دى
وسعيدة ان اسلوبى لاقى اعجاب منكم
بالنسبة للموضوع ده فعلا مأزمنى
وكلام حضرتك مربط الفرس
السيناريو اللى اتكلمت عنه بيحصل ..انتظار رد فعل معين
الموضوع مش حكاية انى بنتظر شكر من حد
بس ببقى نفسى زى ما بطمن على صحاباتبى ..اسمع صوت حد منهم مرةهى اللى تتصل..مجرد احساس
مش حكاية تعقيد...بس فعلا جت عليا فترة
حسيت فيها انى نفسى اوووى اتكلم مع صحباتى زى زمان...حسيت انى محتجاهم اووى فى وقت مكنش حد فيه معايا
حاجة زى ادمان...
نقطة ان الانسان بتعامل مع الله اولا واخرا مهمة اوووووووى ...ولو فعلا قدرت اوصلها..اعتقد هستريح اكتر
عارفين اوقات بحس انى بقدر اوزن المعادلة صح..
مش ببعد بس احساسى بيتظبط...مش محتاجة حد وفى نفس الوقت سعيدة مع نفسى ..واللى بيحصل ان بلاقى اللى بيسأل عليا:)
بقول سبحان الله ..الحاجة اللى بتزهد فيها بتجيلك
سعيدة بتعليق حضرتك
توأمتى :)
ادينى هطب عليكى بكرة ..نكمل كلام:)
ولا خلينا نغير الموضوع احسن ونشوف مناظرة جديدة
السلام عليكم ورحمة الله وبركاته
في الحياة نقابل بشرا كثيرين
منهم من لا نرتاح إليه
ومنهم من نشعر بالاحتياج
للفضفضة معه
إذا توافرت فيه صفات معينة
كأن نشعر معه بالأمان
والطيبة والشهامة وحفظ السر
وأشياء كثيرة
المهم أن نجد الأشخاص التي تستحق أن
نمارس معها البوح
البوح رياضة نفسية مفيدة و مريحة جدا
الأهم أن تصححي الآية الكريمة
يقول الله سبحانه وتعالى:
يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى
وَجَعَلْنَاكُمْ شُعُوبًا وَقَبَائِلَ لِتَعَارَفُوا
إِنَّ أَكْرَمَكُمْ عِنْدَ اللَّهِ أَتْقَاكُمْ
إِنَّ اللَّهَ عَلِيمٌ خَبِيرٌ [الحجرات:13]
مكتوبة في التدوينة
خلقناكم شعوبا وقبائل
وهي جعلناكم
**************
تحياتي وكل عام وأنتم بخير
ورمضان كريم
آدم
وعليكم السلام ورحمة الله وبركاته
استاذ ادم...شكرا جدا جدا على التعليق والزيارة
كلام حضرتك تمام...
عجبتنى جدا فكرة ان البوح رياضة نفسية ...فعلا لما فكرت فيها بصورة سوية لقيتها كده
اعتذر جدا عن عدم الانتباه الى الأية الكريمة
وجارى التعديل
بصى دى الحياه بقت رتمها سريع بس الناس بتبان فى الشده حاولى تلاقى عذر وبس للى قدامك لانك انتى اللى هتتعبى
د رضوى
كلنا بيجي علينا أوقات الواحد فينا يبقى مخنوق من كل اللي حواليه
بس حتى لو قدر انه يقعد مع نفسه يوم و التاني
مش هيقدر يواصل
سبحان الله
فطرة الانسان اللى ربنا خلقنا بيها ان الانسان يعيش في جماعات
الانسان بطبيعته اجتماعي
و المشكلة ممكن من انك اتعاملتي مع ناس بغير الاسلوب المطلوب للتعامل معاهم
محدش بيتعلم ببلاش يا دكتور
خلي الجملة دي قدام عينك على طول
علشان ما تدفعيش تمن العلم مرتين او اكتر
بجد مدونه ممتازه
يارب يوفقكم
ان شاء الله اتابع المدونه علي طول
اتمني التواصل
رمضان كريم
كل سنه وانتم طيبين
طيب اهو رمضان جاى
هتفضلى لوحدك برده ؟؟؟
كل سنه وانتى طيبه يا رودى
صحيح هو انا قلتلك انك ليكى كلمتين صغننين كده فى البوست الجديد ياريت تنورينا قريب
يلا سلام
Post a Comment